Ady Thijsen na Angel Bermudez : Aruba ta den fase di ‘surseance van betaling’

ORANJESTAD – Declaracionnan recien haci pa minister nobo di finanzas Angel Bermudez, segun parlamentario di partido MEP Ady Thijsen, tabata hopi fuerte. Entre e declaracionnan cu Thijsen ta referi na dje, ta e hecho cu e minister di finansas a declara cu nunca hulanda a para garantia pa aruba, y cu nos no ta bancarota, y cu Hulanda a cometi un fayo den e proceso pa no laga gobernador firma. Bermudez na tal occasion ( Thijsen ta referi na e programa recien di television) a bisa e no kier hinca su curpa den e discussion aki pero ne mesun momento ta mustra lo contrario. “Mi ta kere e minister en cuestion no mester hasi tipo di remarcanan cu no ta su lugar” Thijsen a bisa pasobra segun e parlamentario, semper mester tin consentimento di hulanda ora pais Aruba lo kier bai hasi un prestamo den exterior. “ Esaki bo por a conclui tambe den e voorwaarden cu a wordo presenta door di Rijksministerraad” Thijsen a sigui bisa. Ariba e parti di bancarota mester enfatisa cu nos ta den fase di "surseance van betaling" cu den principio ta nifica rumbo bancarota. Segun Thijsen, esaki si e ta lubida pa menciona evitando di ta sincero cu pueblo. Tambe e la declara cu Hulanda lo a comete un fayo. Esaki ta mustra cu ta sigui defende loke a bai robes. Remarcabel ta cu e tambe tawata na altura di e besluit unda cu nan mes a entrega e autonomia financiero. Si bo wak e contenido den e acuerdo financiero bo lo ripara cu ta precies loke tin den e KB."