PDR: Lo sostene tur mocion di desconfianza contra minister di husticia

ORANJESTAD - PDR lo para tras tur mocion di desconfiansa cu bin riba minister di husticia! Asina su lider Andin Bikker a bisa durante nan conferencia di prensa e siman aki. Bikker a relata riba e ola di criminalidad cu ta sutando e Isla aki. El a bisa cu nos comunidad ta 'cansa, fada y harta di e situacion aki y gobierno mester saca su conclusion'.

CANTIDAD DI ATRACO

PDR a tuma nota cu den fin di siman tabata tin por lo menos cuater atraco y hasta den un caso e atracadornan a bisti uniform di polis, pa comete nan fechoria. " E minister di husticia te ainda no tin un plan y cada bes ta cana rond ta busca excuus. P'esey varios mocion di desconfianza e minister a haya den parlamento caba" Bikker a sigui bisa. E parlamentario a recorda cu tempo di eleccion e prome minister a cana rond ta priminti cu e ta bay soluciona e problema di criminalidad cu e tempo ey e tabata consider'e hopi serio, pero awor aki e situacion a bay for di man.

OTMAR ODUBER

E parlamentario a bolbe trece dilanti cu hasta minister Otmar Oduber a manda un voto di desconfiansa p'e precisamente door di criminalidad, y a menciona esaki como un di y nuebe puntonan cu el a pone riba un carta pa Gobernador, dia 6 di januari cu si no ta haya solucion dia 1 di maart e ta pidi su retiro y p'esey e ta pidi e minister pa invita resto di gabinete Eman 2 bay cu ne pasobra esaki no ta tolerabel mas.

SACA CONCLUSION

Bikker a sigui mustra cu e no ta compronde pakico minister di husticia of inhusticia no a saca su conclusion pasobra un persona no por ta un pais ni un pais no ta un persona. El a bisa bek cu pa motibo cu nos tin un gabinete cu ta keda sostene e minister aki, nos pueblo tin cu keda sufri pa via di esaki. E ta cuestiona cu pa colmo prome minister Eman ta spaar fly miles, pasobra atrobe e tin tres siman for di Aruba y e ta puntra di unda ta sali cu desde cu el a drenta gobernacion biaha e ta biaha, y awor pa tres siman si no ta mas. Si no ta biaha y saca potret tur caminda, ora e ta na Aruba ta chapi den cura cana rond, haci tur cos menos bin Bestuurskantoor y den Parlamento practicamente e no ta bin.