Gomes: Pa 6 aña largo problemanan social no a haya prioridad necesario

ORANJESTAD - Pa 6 aña largo e problemanan social, incluyendo abuso sexual di mucha-, no a haya e prioridad cu e mester a haya. Esey e fundacion Lisette Gomes a compronde durante nan reunion ayera cu  parlamentarionan. Mes momento Gomes ta considera e reunion di ayera como apenas e prome paso pa yega na un solucion permanente pa e problema di abuso sexual contra mucha. E reunion tabata mas bien un presentacion di parlamento na e fundacion pa mustra tur loke a wordo haci despues di entrega di un manifiesto na 2010 caba. 

RAPPORT Y MAS RAPPORT

Manera por a spera, tur cos a keda na rapport di tur instancia y nada mas no a wordo haci, manera aloca placa pa drecha e sistema y pone personal y ekipo necesario. Durante un proximo reunion publico cu a keda pidi ayera, lo parlamentarionan puntra e respectivo mandatarionan kico tur a sosode riba e tema aki. Awor tin cu sinta cu e.o. minister Arthur Dowers prome cu e reunion publico pa scucha di su banda kico a pasa, pa por 'trece un balansa entre parlamento y minister' y wak kico e proximo pasonan ta. E reunion di ayera tabata parti di e promesa haci siman pasa na e fundacion pa reuni riba e tema importante aki di abuso sexual contra mucho. 

SISTEMA FULL BRUHA

Loke ta lamentabel segun Gomes, ta cu e situacion ta uno 'full bruha' unda cu ora cu tin un problema social, e persona(nan) no sa unda pa bay. "Bo por yega bureau Sostene mi, bo por bay polis y bo por bay docter. Pero no tin un richtlijn pa bisa cu esaki ta e caminda corecto. "Esey ta loke nos a pidi nan cu ta mas urgente na e momento aki, mas cu e ley mes, pa keda resolvi. Despues di e reunion cu minister, lo trece nan siguiente punto dilanti. Foto di facebook cortesia Dangui Oduber.