Hopi usuario na Aruba infecta cu 'virus' riba nan pagina di Facebook

ORANJESTAD - For di algun dia, pero ayera mas cu nunca, tabatin un cantidad di usuario local cu a haya nan mes den un situacion fastioso ora cu diripiente nan cuenta di facebook a keda 'infecta' cu un virus. E problema no ta uno serio, pero e ta mas bien un molester pa tanto e usuario, como su amigonan. Diripiente varios persona a cuminsa haya nan mes cu e virus, y ta pidi despensa riba nan pagina personal pa 'e inconveniencia'. E virus por cierto a plama rapidamente, pa e forma 'inocente' cu e ta aparece. 

CON E VIRUS TA MANIFESTA

Investigacion cu NoticiaCla.com a haci, ta cu e forma cu e virus ta aparece, ta den un forma casi semper di un noticia cu ta liga na un 'link' cu un titulo 'atractivo' cu ta hala atencion. E hecho cu e ta bin di 'amigonan' di e usuario, ta pone cu e usuario no ta pensa dos biaha y tampoco nada maligno, y ta click riba e link. Unabes cu e click riba e link, e ta infecta su cuenta, cu na su turno ta cuminsa manda e virus pa tur su amigonan. Asina e virus ta keda plama rapidamente. Den caso di e virus aki, e no ta 'delete' cos sino simplemente ta keda manda mensahe na cantidad. 

FORMA DI E VIRUS

E virus ta bin den un forma pues di un mensahe, cu un titulo manera 'Wak kico e tata a haci ora cu el a haya su yiu den camber etc..' y e persona ta click pa haci kaweta. Of un mensahe 'inocente' bisando cu e persona kier a 'comparti' esaki cu e usuario. Y ora cu e persona click, e daño ta haci. 

CON PA EVITA VIRUS

E forma con pa evita pa nan 'infecta' bo account, ta pa bo cambia bo clave (password) frecuentemente, y tambe bay den bo settings y delete tur e programanan cu 'bo no conoce', pero cu si ta aparece den bo sistema. E ta poni den e parti full rechts ariba un pijltje cu ta mustra abou. Ora bo click riba esey bo ta mira e set di opcion y bo ta busca 'settings' y 'private settings' y na banda full links busca e parti di 'apps' y compara ki apps 'straño' bo tin cu no ta conoci.