A lansa conferencia 'Happiness 360 Aruba' na Cuba awe

HAVANA – Diamars mainta na Havana Cuba, Aruba a oficialmente anuncia fechanan ( 13 y 14 di september 2016) pa e conferencia internacional “Happiness 360”. Esaki a sosode durante e di 60 reunion di e comision regional di United Nations World Tourism Organization (UNWTO) pa e region di Americas.  

ANUNCIO HACI 

E anuncio a tuma lugar den presencia di e.o Secretario General di UNWTO Sr. Taleb Rifai y (vice) Ministernan for di paisnan manera Jamaica, Haiti, Argentina, Brazil, Chile, Cuba, Peru, Puerto Rico y otronan. E delegacion di Aruba cu a asisti e reunion, y cu a biaha pa diferente otro reunion, a consisti di minister di Turismo, Otmar Oduber, CEO di ATA, Ronella Tjin Asjoe-Croes, Edwin Abath di departamento di relacion exterior y mas persona.

MIDI E HAPPINESS INDEX

E intencion ta pa mara cultura cu turismo como tambe entre otro e importancia di implementacion y midimento di e felicidad di tur habitante pa medio di entre e "Happiness Index" diseña pa UNWTO. Na final di e discurso e delegacion a comparti un video di e destinacion Aruba. E video a clausura cu un invitacion pa e conferencia cu lo tuma lugar den luna di september na Aruba. E (vice) Ministernan presente a ricibi como regalo e buki “Mi Preti Wowo” cu fotonan di Armando Goedgedrag, Shamira Raphaela y Ken Wolff. E otro ehecutivonan di turismo a ricibi como recuerdo un pintura hopi bunita di Aruba produci pa Sra. Trudy Lampe. Hunto cu e recuerdonan tambe nan a ricibi e “Save The Date” pa asina nan por programa e fecha pa por ta presente na Aruba.

ORADORNAN PA E CONFERENCIA

Algun di e oradornan pa e conferencia lo ta Secretario General di UNWTO Sr. Taleb Rifai y presidente di Florida Caribbean Cruise Association Sra. Michelle Paige. Den simannan cu ta sigui lo duna mas informacion referente "Happiness 360", cu ta un oportunidad unico pa nos socionan local. Durante e siman aki mientrastanto cu e delegacion ta na Cuba lo reuni cu diferente stakeholders pa asina explora formanan di colaboracion entre Aruba y Cuba. Tambe lo firma un MOU enfoca riba turismo.