AZV a termina contracto cu docter Mercedes Rivera

ORANJESTAD - AZV a termina e contracto cu docter Mercedes Rivera. Den un comunicado di e organo ehecutivo di aseguro medico general, a mustra cu a base di informacion cu AZV ta compila regularmente di tur e dunadonan di cuido y a base di reporte di expertonan, AZV a yega na e conclusion cu no ta responsabel pa laga dokter M. Rivera traha como specialista medico independiente. 

INTENTO DI AREGLO FRACASA

AZV kier a yega na un solucion unda dokter M. Rivera lo bay traha bou guia y supervision di hospital, sin embargo te cu awe esaki no a logra. Concecuentemente, e contracto entre AZV y dokter M. Rivera a termina dia 1 di mei 2016. Dokter M. Rivera a lanta un caso den corte contra e terminacion di contracto di AZV. Ainda no tin un veredicto di hues den e caso aki. 

TRASLADO DI PASHENT 

E pashentnan di dokter M. Rivera por acudi awor cerca e otro internistanan di Dokter Horacio Oduber Hospitaal, esta: dokter J de Kort, dokter E Sanchez, dokter K Kelly, dokter S Waterloo y dokter A Hoogendam. Tur receta y test di laboratorio prescribi door di dokter M. Rivera prome cu 1 di mei 2016, por wordo uza ainda te cu 31 di mei 2016 (es decir; un receta prescribi prome cu 1 di mei por wordo entrega ainda na botica te cu 31 di mei 2016 of un test di laboratorio por wordo haci ainda te cu 31 di mei 2016)