Siguiendo reglamento, 'por lo pronto' Gobernador Refunjol ta keda

ORANJESTAD - Gobernador Fredis Refunjol ta keda den su funcion por lo pronto, te ora cu tin un reemplasante. E fecha riba cual su termino ta vence tabata diadomingo ultimo. Pero mirando cu ainda no tin un reemplasante nombra, NoticiaCla.com a compronde cu ta aplica articulo 4 di e reglamento pa Gobernador di Aruba. Esey ta stipula cu 'Gobernador ta obliga pa eherce su funcion te ora cu su sucesor asumi e funcion ey'. Pero tin stipulacion cu por cambia esey tambe, manera cu e reglamento tambe ta stipula manera 'a lo menos cu e (Gobernador) termina su funcion riba un tempo previamente riba orden Real of un permiso'. 

PROCESO PA BUSCA REEMPLASANTE

Manera ta conoci, e proceso ta andando pa busca un reemplasante pa Gobernador Refunjol. Algo cu segun NoticiaCla.com a compronde, por dura un periodo ainda, di entre 3 pa 5 luna. Gobierno tin un lista di por lo menos 3 candidato cu nan a presenta recientemente den nan ronda interno na e.o. lidernan di fraccion, y tambe gremionan. NoticiaCla.com a compronde cu por lo menos un fraccion a presenta nan propio candidato(nan), mirando cu nan no ta sostene e candidatonan cu nan a wordo presenta cune. 

CLA PA RETIRA DI SU FUNCION

Tabata recientemente cu Gobernador Refunjol a anuncia cu e tabata cla pa baha y 'asumi' su tarea regular di un tata di famia. Durante su ultimo discurso na e Oranjebal, el a dedica basta atencion na e tema aki, mustrando cu e ta 'sperando anciosamente' riba su sucesor, mescos cu ta e caso cu comunidad cu tambe ta wardando mescos. Mes momento el a desea e persona aki hopi exito cu e funcion y a duna algun conseho pa e funcion ey. NoticiaCla.com a compronde cu pa mas tarda september por tin un gobernador nobo huramenta pa pais Aruba, aunke cu esaki por ta mas prome tambe.