Hobennan a subi caya den e lucha contra cancer

ORANJESTAD - Luna di april y mei ta e lunanan den cual Koningin Wilhelmina Fonds Aruba ta tene su colecta anual pa asina recauda fondo pa sigui cu e trabounan cu nan ta eherce pa comunidad pa asina sostene pashentnan di cancer y nan famianan, pero alabes tambe duna informacion y concientisa comunidad riba kico ta cancer.

SUBI CAYA

Siman pasa y e fin di siman aki diferente grupo den nos comunidad a subi caya pa asina duna nan sosten y haci nan aporte pa comunidad. E hobennan di Key Club di International School of Aruba, Rainbow Girls, DeMolay, un grupo di trahadornan di Valero y RBC y algun otro boluntario mas a para na diferente punto rond di nos isla y colecta.

GRADICIMENTO

Koningin Wilhelmina Fonds Aruba ta gradici un y tur cu ta duna nan sosten. Tur placa cu wordo colecta ta bay directamente bek den comunidad por medio di servicionan cu e fundacion ta brinda manera entre otro yuda pashentnan cu peluca y prothese, transporte pa bay tuma tratamento, cuido na cas y tambe yuda cu pasashi pa un persona por compaña su ser keri na momento cu e tin cu bay den exterior pa tratamento.

META DI KWF

E meta di Koningin Wilhelmina Fonds ta primeramente prevencion, pero semper ta duna yudansa tambe. Gastonan ta mas di 400mil florin pa aña y e suma ta aumentando tur aña. E aña aki e meta di e fundacion ta pa yega 500mil florin. 

CON PA APORTA

Si abo kier duna bo aporte of kier mas informacion, bo por tuma contacto cu nos Centro di Informacion situa den Spinozastraat 9 of por bel durante orario di oficina na 5820412. Tambe por bishita nos FaceBook page Koningin Wilhelmina Fonds Aruba y webpage www.koninginwilhelminafonds.com