Aruba lo firma MOU cu Cuba pa cooperacion den turismo

HAVANA - E mesun siman cu e prome bapor crucero Mericano ta yega Cuba atrobe desde 1978, Aruba lo firma un acuerdo turistico riba e tema aki tambe. "E siman aki na Havana, Cuba, gobiernonan di Aruba y Cuba lo firma un acuerdo di cooperacion cu enfoke ariba turismo". Asina e minister di turismo a duna di conoce na su salida dialuna ultimo pa Cuba. Desde mas of menos un aña pasa a cuminsa cu tramitenan entre departamentonan di asuntonan exterior di ambos pais, unda cu despues a bishita e isla pa combersa cu e mandatario encarga cu transporte, Cesar Ignacio Arocha Macid. 

POSIBILIDANAN 

A papia entre otro riba e posibilidadnan pa crea un ruta di barconan crucero specificamente entre e dos paisnan aki hunto cu otronan den e region mas zuid di Caribe. Combersacionnan cu e titular di Turismo a continua tambe algun luna atras cu su coleganan di Panama y Corsou.  "Aruba ta mira Cuba manera un destinacion nobo, apesar di ta existi pa basta tempo caba. Pronto lo conoce cambionan organisatorio cu lo percura pa haci di Cuba un destinacion mas atractivo pa explora for di e mercado Mericano y e convenio aki ta pa nos por ta alinea cu posibilidadnan nobo cu esaki lo por brinda pa Aruba", asina Minister Oduber a duna di conoce. E foto ta uno di archivo di e ultimo bishita di e delegacion di Aruba na Cuba.