ATA: ATCA 2016 lo actualisa mercado Mericano cu producto Aruba

ORANJESTAD - E conferencia anual di turismo ATCA 2016 lo inicia e siman aki cu 71 participantenan strategico den mercadeo y benta di Aruba pa e mercado di Norte America. E participantenan ta procedente for di diferente estadonan di Norte America como tambe for di Canada.

META DI ATCA

ATCA 2016 ta trece diferente partnernan international hunto incluyendo tour operador y representantenan di hotelnan y aerolineanan na unda durante tres dianan intensivo, ta comparti detayenan relevante di interes cu ta parti di e exito di turismo di Aruba. Ademas, durante e conferencia A.T.A. lo comparti e progresonan pa cu embeyecemento, mehoracion y mantencion di e producto Aruba, desaroyo di producto y servicionan cu ta beneficia Aruba den su totalidad. Obhetivo di ATCA ta pa brinda posibilidad pa reforsa e conocimento di Aruba na e ehecutivonan y pa sigui traha riba e relacionnan cu e socionan, enfocando asina riba oportunidadnan cu por enrikece nos mercado turistico. 

MERCADO PRINCIPAL DI ARUBA

Norte America ta e mercado principal pa cu Aruba su turismo cu –durante 2015- a cubri 54.3% di nos bishitantenan. Pa e prome tres lunanan di 2016, e mercado aki a cubri 58.4% di e total di turismo pa Aruba.

SCHEDULE DI ACTIVIDAD

E conferencia ta tuma luga for di 3 di mei te cu 6 di mei cu un programa amplio y difersifica. Diamars anochi lo bay tin e apertura oficial cu palabra di bonbini di entre otro CMO di A.T.A. Sanju Luidens-Daryanani, tambe Jim Hepple CEO di AHATA y e General Manager di The Ritz-Carlton. Diaranson mainta lo tin diferente presentacion como tambe exposicion unda lo mustra e variedad di actividadnan cu Aruba tin pa ofrece. Ademas lo tin un presentacion di e conocido Arnaud Collery cu ta hiba e titulo ‘Connecting is Happiness’. Parti merdia e participantenan lo participa na e prome reunionnan di e asina yama ‘market place’ na unda despues Ronella Tjin Asjoe-Croes CEO di A.T.A. como tambe Alex Nieuwmeyer, Managing Director di Divi Resorts lo dirigi nan mes na esnan presente.

MARKETPLACE

Diahuebs henter dia e ‘market place’ lo continua y esaki ta caminda encuentronan importante entre socionan local y e participantenan ta tuma luga pa asina negocia y amplia oportunidadnan pa e proximo temporada.