Minister Hooyboer buscando solucion pa studiantenan rubiano na universidad di Corsou

ORANJESTAD/ WILLEMSTAD  – Minister Michelle Hooyboer-Winkaar a cuminsa sondea e posibilidadnan pa haci adaptacionnan pa e studiantenan cu ta confrontando problema na Universidad di Corsou debi na aumento di e asina yama ‘college geld’ (mira e aumento di tarifa aki). E mandatario ta lamenta mal informacion riba e situacion di studiantenan rubaino afecta na Corsou. Segun e mandatario, e la tuma nota den medionan di comunicacion di Corsou y a ricibi informacion di diferente mayor y studiante cu ta studia na Corsou cu a informa tur studiante cu pa aña academico 2014-2015 lo hisa e suma di college geld na Universidad di Corsou. Hooyboer ta sigura cu e informacion aki no a yega oficialmente serca dje of na Departamento di Enseñansa di Aruba pero cu mesora e la a tuma contacto cu Universidad di Corsou pa verifica e informacion aki.

Aki e la haya confirmacion di Universidad di Corsou cu e Universidad a wordo notifica di e decision pa e cambionan den e sumanan di college geld dia 11 di juli ultimo y cu pa Universidad mes esaki tabata un sorpresa. E decision a ser tuma pa Minister di Enseñansa di Corsou y a bin na un momento hopi dificil mirando cu ta temporada di vakantie y cu varios studiante ya a ricibi informacion tocante admission y/of a inscribi caba segun e condicionnan existente.

Mirando cu e decision a wordo tuma y publica hopi laat a haci'e imposibel pa Departamento di Enseñansa por a anticipa riba e cambionan aki pa adapta e sumanan den fiansa di estudio di Aruba. Na januari ainda ora cu Minister Hooyboer a bishita Corsou y reuni cu entre otro e rector di Universidad y e studiantenan di Aruba, e plannan pa e cambionan aki no tabata conoci. Loke a bin dilanti durante di e bishita di Minister ta cu algun studiante a indica cu e suma actual di 14.000 florin cu nan ta ricibi anualmente pa algun no ta suficiente.

Otro studiantenan ta indica cu nan tin nan mayornan ta duna un man y tin otro studiantenan studiando na Corsou cu ta indica cu e suma ta yega pa cubri nan gastonan y nan hustamente no lo opta pa fia mas. Na e momento ey caba por a constata cu mester haci adaptacion den e sistema di Aruba lening di Aruba, Corsou y region pa haci e sistema uno mas flexibel y cu diferente opcion pa esnan cu kier fia un poco mas of fia menos.

E mandatario a informa cu e lo sigui delibera cu Minister di Finanzas riba con lo por facilita e studiantenan existente pa un aumento pa e aña academico aki ainda y ta sperando un conseho oficial di Departamento di Enseñansa pa asina traha hunto cu Minister di Finanzas pa yega na un solucion. Mes momento e mandatario di enseñansa a ricibi confirmacion cu a crea diferente opcion y areglo di pago pa e studiantenan. Universidad di Corsou tin tur comprension pa e situacion y ta ofreciendo 5 diferente opcion di pago na e studiantenan.