Bergen: 'Mayornan di scol 'Agnes' y 'Rayo di Solo' no paga pa airco'

ORANJESTAD - Siman pasa mayornan a publica cartanan riba facebook, ricibi di cabesante di scol preparatorio Agnes y Rayo di Solo riba asunto di pago di airco etc. Basa riba esaki, miembro di partido den oposicion Luigi Bergen (e la lidera e grupo di mayor aña pasa pa no paga schoolgeld) a reacciona bisando mayornan na 'no paga contribucion di mayor ni airco'. E minister encarga (Hooyboer) ta kere cu e ta un asunto cu SKOA tin cu atende. 

E CARTA 

E cartanan cu Bergen ta referi na dje, ta informa cu a paga airco den klas riba e muchanan. E carta ademas ta culpa mayor di no a paga aircogeld y ta pidi pa paga. Segun Bergen, ta comprendibel cu placa di gasto di operacion di scol no ta yega. Esaki sinembargo no ta pa falta di mucha of mayor. Conforme ley e carta mester bay pa gobierno, pa medio di directiva di SKOA, cu e mesun acusacion.

GOBIERNO TA CULPABEL

E miembro di partido geel ta mustra cu gobierno ta esun culpabel pa e situacion penoso aki. Gobierno mester maneha conforme (1) tratado, (2) constitucion y (3) ley. (1) Tratado di Derecho di Mucha ta stipula cu enseñansa primario y secundario (scol preparatorio y basico y avansa) mester ta gratis. (2) E constitucion di Aruba ta stipula cu gobierno mester financia enseñansa particular mescos cu enseñansa publico. (3) Ordenansa Nacional di scol preparatorio (art. 46 inciso e2), basico (art. 54 inciso e2) y avansa (art. 66 inciso e2) ta stipula cu gasto di energia electrico mester wordo financia pa gobierno.

CASO SUMARIO

Por corda cu 8 di Juli 2015 hues a dicta na fabor di mayornan contra aumento di contribucion di mayor y pago di airco. Hues a indica cu SKOA no por forsa ningun mayor pa paga. SKOA no por tuma ningun repercusion riba e mucha, si e mayor no paga. Paga airco riba e muchanan ta claramente un repercusion, cu ta viola e veredicto di hues. Pa cada dia cu e violacion tuma lugar, hues a stipula un suma di mil florin, cu SKOA mester paga.

BERGEN CU PETICION NA SKOA Y GOBIERNO

Segun Bergen e tin algun peticion na SKOA y Gobierno. (1) Cende e airco bek den klas pa e muchanan haya les. (2) Cabesante manda un carta pa directiva di SKOA cu peticion pa obliga Gobierno pa cumpli cu ley. (3) Informa Simar di e situacion penoso cu e scol ta aden na fin di aña escolar. (4) No perhudica e muchanan den ningun forma, nan no tin falta. (5) "Gobierno cumpli cu tratado, constitucion y ley!!" Bergen ta finalisa bisando. 

REACCION DI MINISTER

E minister di enseñansa Michelle Hooyboer su reaccion tabata hopi corto na NoticiaCla.com riba e materia aki. Contrario na e pensamento di Bergen, e mandatario ta considera esaki un asunto di SKOA. "SKOA a informa nos cu nan ta wardando e 'bodem procedure' pa determina ki impacto financiero esaki lo por tin" Hooyboer a comenta brevemente na e portal aki.