Croes: Lo aloca fondonan adicional pa instancianan contra abuso di mucha

ORANJESTAD - Mientras cu no ta menciona e suma di e fondonan adicional, minister di asuntonan social Paul Croes den fin di siman, a raporta cu 'lo aloca fondonan adicional pa instancianan contra abuso di mucha'. Segun e mandatario, den Conseho di Minister e siman tras di lomba a yega na e desicion cu lo pone fondonan disponibel pa asina apoya e diferente departamentonan y instancianan cu ta lucha contra abuso di mucha. No ta conoci tampoco si esaki ta como resultado tambe di e protesta reciente riba e topico di abuso sexual di mucha. A priminti e gruponan di protesta cu e siman aki lo reuni cu nan. 

VARIOS DEPARTAMENTO

Ta trata di varios departamento social y di husticia cu lo mester di e apoyo aki pa nan por yega na mas personal profesional y capacita. Minister Paul Croes a anuncia cu e la laga haci un evaluacion pa asina haya sa e necesidad di mas urgente cu tin den e area social. Aki ta pensa riba Departamento di Asuntonan Social, Imelda Hof, Bureau Sostenemi y otronan den e sector di Husticia. Hunto cu Minister di Husticia a propone esaki na conseho di Minister pa asina haya aprobacion. "Mirando e necesidad pa sigui lucha contra abuso di mucha, pa asina casonan keda trata den un forma diligente, nos lo duna e apoyo necesario na e diferente instancianan", Croes a mustra. Lo aloca fondonan pa asina yuda henter e cadena cu tin cu guia, protehe, cuida y alerta nos comunidad contra abusadornan di mucha.  Croes ta kere cu na momento cu bo reforsa e veld, bo ta yuda pa castigonan pa abusadornan bira mas pisa. Cu un bon voorwerk, bo lo haya casonan mas solido presenta dilanti corte.