Gobierno di Bonaire a cay diabierna mainta

KRALENDIJK - Gobierno di Bonaire a cay awe mainta. Despues cu diahuebs anochi reunion no a sigui di Eilandsraad pa falta di quorum, e intencion tabata pa tene un reunion diamars anochi 7'or pa trece claridad. Pero diabierna mainta gezaghebber di Bonaire Edison Rijna a confirma na NoticiaCla.com cu e la ricibi un mail di e parlamentario Esther Bernabela, unda cu e ta anuncia cu e ta retira su sosten na UPB. Y esey ta nifica segun Rijna, cu gobierno enberdad a cay. Awor Rijna ta wardando e carta oficial, pa asina e tin un toke mas oficial. Pero e prome mandatario di e isla di Bonaire a confirma pues cu gobierno awor si a cay. 

FALTA DI QUORUM

Pa falta di quorum, un reunion importante di Eilandsraad na Bonaire no por a tuma lugar, lagando e isla den un incertidumbre pa loke ta su situacion gubernamental. Esaki despues cu parlamentario Esther Bernabela lo a laga su sosten cay pa UPB. Esey a pone cu na comienso di dia tabatin rumornan persistente cu gobierno di e isla a cay. Pero esey no tabata e caso. "Gobierno no a cay" tabata e reaccion di gezaghebber Edison Rijna pa NoticiaCla.com diahuebs atardi. Segun gezaghebber, e reunion di eilandsraad lo mester a continua diamars awor. E ora ta spera di haya claridad. 

FALTA DI QUORUM

E problema di quorum diahuebs anochi tabata pasobra cu Bernabela no a presenta. Fuera di Bernabela, a compronde cu 3 miembro di MPB tambe no lo no a presenta causando e problema di quorum. Segun lider di e partido MPB, Elvis Tjin-Asjoe na NoticiaCla.com, e ta considera cu tin un crisis den gobierno di Bonaire. Pero no awo so."For di inicio di e coalicion aki. Pa basta tempo" Tjin Asjoe a bisa cu ta papiando di crisis. 

CARTA DI UPB

Mientras cu rumornan persistente tabata papia di un caida di gobierno, informacion cu gezaghebber lo a ricibi un carta di UPB cu nan ta 'revoca' nan sosten na e coalicion a keda rechasa. "Te awor, ningun carta a yega cerca mi" Rijna a sigui bisa NoticiaCla.com diahuebs anochi. Hecho ta si, cu tin un incertidumbre riba e situacion di gobierno na Bonaire, y cu e isla di flamingo ta drenta un fin di siman largo di incertidumbre. Foto di parlamentario Esther Bernabela ta cortesia di Aimed Ayubi.