A adapta ley pa admision pa ciclo basico HAVO/VWO

ORANJESTAD - Gobierno a adapta e ley pa admision pa ciclo basico HAVO/VWO. Dia 5 di april ultimo minister Michelle Hooyboer-Winklaar a formalisa un “Ministeriële Beschikking” (MB) pa instala un comision pa evalua y determina normanan nacional pa admision na ciclo basico di Havo/Vwo. E instalacion di e comision aki ta a base di e cambionan di ley cu Minister di Enseñansa a introduci den ley (Landsbesluit dagscholen mavo, havo, vwo) cu ta regula entre otro e scolnan Colegio San Nicolas y Colegio Arubano.

TRANSICION DI SCOL

E transicion di scol basico pa scol secundario, y specialmente pa ciclo basico di Havo/Vwo, ta pa hopi aña caba un punto di discusion. Actualmente ta selecta alumnonan na porta a base di un toets cu ta determina pa 100% e admision na un scol pa Havo/Vwo. Prome cu e actual cambionan den ley e parti aki tabata completamente den man di e scol y/of directiva scol. Cu a adaptacion den ley e norma di admision mester bira uno nacional, uniforme, transparente y teniendo na cuenta e capacidad y potencial completo di e mucha.

SISTEMA NO TA HUSTO

"Cualkier sistema cu ta evalua studiantenan a base di solamente 1 indicador no ta husto, ni efectivo den premira e exito di dje y ki tipo di Enseñansa ta cuadra cu su capacidadnan. Esaki ta e motibo cu mi a boga pa trece cambio riba e practica aki, mescos cu aña pasa nos a nacionalisa e "aansluiting" di MAVO pa HAVO, kitando e ora e decision for di man di directivanan di scol y implementando un maneho nacional", Hooyboer-Winklaar a splica.

COMISION INSTALA

E comision cu a keda instala ta consisti di Departamento di Enseñansa, e directivanan di scol SMOA cu ta maneha Colegio Arubano y DPS cu ta maneha Colegio San Nicolas y e comision ta wordo presidi door di Dienst Inspectie van het Onderwijs. E componentenan y normanan pa determina admision mester wordo evalua y determina door di e miembronan di e comision y ta wordo presenta na Minister di Enseñansa pa por wordo formalisa. Conforme e MB e normanan nacional lo mester drenta na vigor pa admision pa aña escolar venidero caba y e intencion ta pa evalua y determina e normanan tur aña pa e aña escolar siguiente.   E aña aki e comision lo mester tene na cuenta cu e “Colegio toets” a tuma luga caba segun e maneho y planning di Colegio Arubano cu tabata vigente, dus e comision lo mester bin cu un proposicion di loke ta aplicabel pa e aña aki cu por wordo considera un aña di transicion.

PROME REUNION 

E prome reunion di e comision a tuma luga dia 13 di april ultimo unda cu tur partners na mesa e inventarisa y evalua e situacion actual. E siguiente reunion di e comision ta tuma luga dia 29 di april unda cu ya lo cuminsa discuti diferente proposicion. E comision tin un tarea sumamente importante. E comision lo mester evalua y propone e  “wijze van onderzoek” manera cu ley ta prescribi. Den esaki nan mester selecta e componentenan cu ta determina admision (por ehempel cifranan di scol basico, conseho di scol basico, un toets di entrada, e diferente areanan y/of disciplina nan cu ta considera pa e toets etc) , e peso di cada componente y e normanan cu ta pertenece na cada componente. Conforme ley e “evaluacion” mester ta uno completo y intencion sigur no ta pa laga un toets ta e unico componente (alles bepalende factor) pa admision na ciclo basico di Havo/Vwo. Adicional na esaki e comision lo mester “benchmark” den reino, pa asina evalua y compara e diferente proceduranan y normanan cu ta wordo aplica na entre otro Curacao, Sint Maarten y Hulanda. Tambe e comision tin e responsabilidad pa cu e control di calidad y “externe validatie” di un toets di admision cu nan por delega na expertonan. Esaki ta pa determina cu nos ta midiendo loke nos kier midi y cu e instrumentonan cu nos ta aplica ta confiabel y por di berdad ta un predictor di exito. Tambe e "spelregels" rond di un toets ta algo cu e comision lo determina, por ehempel na ki momento por tin un herkansing pa un of mas parti di un toets.

CAMBIO DI LEY  

E cambionan di ley y instalacion di e comision pa cu admision na scol secundario, specificamente Havo/Vwo, tambe ta anticipando riba introduccion di nationale kerndoelen den enseñansa primario, esta metanan nucleo pa tur e materianan di e curiculo di scolnan preparatorio y basico. Cu e introduccion di metanan nucleo pa enseñansa primario e ta bira mas cla pa tur actor envolvi kico ta e nivel cu e alumno mester yega na final di scol basico pa asina a base di esaki por sa tambe kico mester evalua y considera pa cu transicion pa scol secundario. Tur e adaptacionnan aki ta den e liña di maneho di Minister Hooyboer-Winklaar pa tin metanan y normanan nacional, uniforme, transparente y husto teniendo na cuenta e capacidad y potencial completo di nos alumnonan. Hooyboer-Winklaar ta pendiente di e prome resultadonan di e trabou di e comision pa asina por comunica e normanan nacional asina cu esakinan keda formalisa.