Gobernador Refunjol sperando ansiosamente riba su sucesor

ORANJESTAD - Mientras cu no tin claridad ken lo bira nos proximo Gobernaodor ni ki tempo esaki lo bira (diadomingo e periodo di Gobernador Refunjol ta vence) ta hopi cla cu e ta cla pa retira di su funcion. Durante su discurso e siman aki na ocasion di e Oranjebal, e recepcion na honor di cumpleaños di nos Rey Willem Alexander, el a referi na esaki varios biaha. "Ami – y casi sigur boso tambe – ta sperando ansiosamente riba entrada di mi sucesor" Gobernador a bisa. "For di awo caba mi ta dese’e, tur cos bon y hopi sabiduria". Loke a resalta, ta cu e ta satisfecho cu su trabou pero tambe contento cu e ta cla pa pasa e 'batuta' pa un otro persona. 

ULTIMO BIAHA COMO GOBERNADOR

Na momentonan di un manera hopi sutil y y otro biaha na un forma mas directo, e tabata referi na e momento aki. "Awe ta un dia unico, pa boso y pa mi. Pa mi un dia masha special, como cu esaki lo ta e ultimo biaha cu ami, como Gobernador, hunto cu boso tur, lo celebra hacimento di aña di nos Rey Willem Alexander" Refunjol a bisa. Cu e periodo tabata uno largo pero fructifero tambe tabata un hecho. " Pa e ultimo diesdos añanan, mi por a celebra, como Gobernador Oranjebal hunto cu boso. Diesdos aña hopi intensivo, durante cua mi a haci tur loke ta na mi alcance, na bienestar di nos isla y reino".

GOBERNADOR CU MENSAHE EMOCIONAL PA FAMIA

Den un tono hopi personal, nos Gobernador a para keto un rato y emocionalmente a referi na e impacto cu e 12 añanan aki tabatin riba su famia. " Mi sa cu entretanto, y cu ansha, mi famia tambe ta sperando yegada di e dia cu atrobe ami lo por ta e simpel y normal Freddy Refunjol.  No mas Gobernador, pero cu atrobe lo mi ta normalmente un esposo, un tata orguyoso y un welo super orguyoso. Durante e ultimo añanan mi tabata masha hopi biaha ausente". Loke por tabata un di e momentonan mas emocional cu a yega di wak Gobernador, el a dirigi su mes e ora na su famia directo cu a comparti e tarima cu ne. " Na mi casa Clarette, mi yiunan Cheryl cu Joaquin, Ricky cu Sui Lin y Zanette, masha masha danki pa boso apoyo incondicional, durante tur e añanan aki!". Y si tabatin cualkier duda cu e tabata sa esaki, el a reitera esaki pa tur hende. "Manera boso tur sa, banda di ta Gobernador, mi ta primordialmente un tata di famia". Y den esaki el a uza esaki tambe pa link su trabou cu pais Aruba y con nos tur mester tene nos mes na regla y ley. "P’esey, brevemente, mi kier compara nos Reino y nos Aruba stima, cu un famia grandi". 

CONVIVI DEN FAMIA 

Segun Gobernador, den cada famia, grandi of chikito, nos ta purba pa convivi  hunto lo mas miho posibel. " Convivi ta nifica, haci cosnan hunto y pa otro. Cuida otro y yuda otro. No solamente pidi of tuma, pero duna tambe. Convivi ta nifica tambe, e deseo pa ta hunto den un relacion duradero. No solamente pasobra cu esaki ta un mester, sino tambe como bo propio escogencia. Pues tambe como famia Arubiano denter di e famia grandi di nos Reino. Esey ta nifica cu concientemente nos a scoge pa cumpli cu e reglanan den nos famia. E reglanan di famia den Reino yama ley". Y na final e no a perde e oportunidad pa recorda esnan presente cu otro aña tin un eleccion pendiente y cu tur hende mester haci uzo di nan derecho sagrado di vota. "Asina tambe, por ehempel, nos a palabra cu cada miembro di famia por scoge den tur libertad, kendenan ta dirigi of guia nos pais, nos derecho di vota. Otro aña tin eleccion na Aruba atrobe. Abo por vota. Haci uzo di bo drecho y haci un bon scogencia. Pa bo mes, pero tambe pa bo yiunan y bo nietonan", Gobernador Refunjol a bisa na e ocasion ey.