Gobernador Refunjol: Un Aruba duradero ta mas cu ta solamente 'green'

ORANJESTAD - Cu Gobernador di Aruba Fredis Refunjol kier un Aruba duradero pa e futuro di nos generacion, tabata un hecho durante su ultimo discurso den su funcion na e Oranjebal e siman aki. "Como famia, como pais y como Reino, convivi cu otro tambe ta rekeri durabilidad of sostenibilidad (sustainability). Mi ta referi anto na un “happy sustainable Aruba” Gobernador a bisa. Notabel si, tabata e hecho cu el a separa e tema "Green" den su contexto politico pa uno mas general. " Boso no ta scucha mi bisa 'Green Aruba'” Gobernador Refunjol a bisa esnan presente e anochi ey.  Y su motivacion tabata hopi cla tambe, splicando cu "esey ta (solamente) un parti di un Aruba duradero". "Ademas, manera boso sa, esey ta un escogencia politico" Gobernador a bisa, pa kita cualkier duda. 

KICO TA DURADERO PA GOBERNADOR

Gobernador Refunjol a sigui riba e tema splicando exactamente kico p'e ta un Aruba duradero. " Un Aruba duradero ta pa mi un Aruba, den cua cada Arubiano por desaroya su mes; un Aruba unda cada Arubiano tin oportunidad y derecho igual, tal manera ta stipula den nos leynan; cu un gobierno y lidernan politico cu ta duna e bon ehempel. “Role-models” (of: ‘goed voorbeeld’) cu ta trata cu transparencia na bienestar di nos comunidad. Un Aruba duradero ta un Aruba unda ta respeta derechonan fundamental, unda ta cumpli cu e reglanan aki y ta mantene nan tambe. Y unda cu Husticia ta castiga infractornan di ley. Un Aruba den cua nos ta prepara nos hobennan pa un futuro duradero, brindando bon ensenansa, brindando seguridad riba caya, na school y na cas." Gobernador Refunjol a sigui bisa. 

HACI SCOGENCIANAN INTELIGENTE

Segun Gobernador, nos ta construi un Aruba duradero haciendo scogencianan inteligente. "Scogencianan pa un balance entre economia y naturalesa. Tocante un balansa entre austeriza y prioriza. Pa construi of no construi den e espacionan scars cu ainda nos tin riba nos isla chikito y cu ta yen". Ademas a mustra cu ta trata di scogencianan cu no ta haci unicamente como “ilusion di dia” of pa probecho politico, pero tambe scogencianan trabahoso cu kisas lo por ta doloroso riba termino cortico. "Tribi haci scogencia cu na final di cuenta ta bon pa nos futuro generacionnan, pa nos yiunan y pa nos nietonan. Di pursi, nan tambe mester por sigui gana nan “pida pan di cada dia” (of: “bread and butter”) riba nos Aruba bunita y stima."

TUR ARUBIANO MESTER COMPARTI

Un nota importante tabata, e forma con Gobernador Refunjol kier a sigura cu no tin division sea pa colo of politica ora di comparti nos prosperidad. "Esaki solamente por, si nos percura tambe cu cada Arubiano, sin importa su descendencia of color politico, por comparti den e prosperidad cu nos tur a yuda crea trahando duro for di aña 1986. Prosperidad cu ta depende di preservacion di loke ta bon, manera  turismo, y e creacion consiente di oportunidadnan y posibilidadnan"

CONSERVACION DI E AUTENTICIDAD DI NOS ARUBA

Mientras cu nos ta un isla turistico, enfoca hopi biaha riba influencia di afo, Gobernador a enfoca cu nos mester percura pa cuida loke ta di nos. Y aki tambe e forma di durabilidad aplica, mester ta bon dirigi. " Durabilidad ta conservacion di e autenticidad di nos Aruba stima y tambe pa hunto – y den balansa – drecha cosnan cu por miho den nos comunidad. Drecha cosnan hunto, unicamente por, si nos ta dispuesto, pa den nos famia, na cas, denter di nos Aruba y denter di Reino, surpasa nos diferencianan di opinion y nos propio interesnan a termino corto; si nos ta dispuesto pa scucha otro; si nos ta dispuesto pa siña di otro y balora, aprecia otro pa e sabidura of experiencia cu cada un di nos ta posee", Gobernador Refunjol a bisa finalmente.