Wix: Detencion di abogado De Hoogd y su libertad despues tin splicacion

ORANJESTAD - E hecho cu un abogado cu a causa un accidente e siman aki por a bay cas, no ta nada abnormal. Por lo menos asina NoticiaCla.com a compronde di abogado Ronny Wix, cu a acesora e abogado envolvi den un accidente e siman aki, esta abogado Gabry de Hoogd. Despues cu e noticia a core cu e abogado a causa un hit and run, tabatin critica cu e persona aki lo a haya trato preferencial pasobra e ta un abogado. Investigacion cu NoticiaCla.com a haci, ta mustra cu ora no tin hende herida den e accidente of ora e daño material no ta grandi e persona en cuestion ta wordo deteni pa 8 ora pa “ontnuchter” of nan ta lag'e bay cas si e tin hende pa hib'e cas. Abogado colega Ronny Wix tabata un di e dos abogadonan cu tabata cu e abogado en cuestion Gabri de Hoogd na e warda di polis. Y abogado Wix den un reaccion pa NoticiaCla.com a confirma e suceso y tambe e motibo pa cual su colega a wordo permiti di bay cas. 

ENVOLUCRACION DI COLEGANAN ABOGADO

Segun Wix, el a wordo notifica cu su colega abogado a wordo deteni despues di a comete un accidente di auto. E ta admiti cu e abogado tabata bebi y cu el a core bay despues di e accidente, aunke no ta mucho cla si e abogado tawata conciente di cu ela dal otro auto, segun e abogado. Segun e version cu NoticiaCla.com a optene, ta mustra cu e doño di e otro auto a yama polis y un rato despues e abogado en cuestion a wordo deteni banda di cruzada di Tanki Flip. Unabes na warda di polis, polis e pidie pa haci un blaastest, pero e abogado a nenga (niun hende por wordo forsa pa blaas segun abogado Wix). Aki mirando e cargonan cu tin, esta cu enberdad el a core bou di influencia y causa un accidente y no kier a supla na e sitio, a pasa pa su detencion. Tabatin e opcion pa e pasa un anochi cera pa 8 ora pa 'su cansansio', pero tambe tin e opcion pa lag'e bay cas. Polis a opta pa laga  bay cas paso el a priminti cu e lo paga e gasto nan di e accidente y cu e lo coopera completo cu polis si nan mester haci mas investigacion. Su auto y su rijbewijs si a keda den beslag. Ainda no ta conoci ki dia polis lo dun'e su rijbewijs y su auto back.

DERECHO DI CIUDADANO 

Cu e acto aki, Wix a splica cu den caso nan asina (caminda no tin hopi daño material y no tin herido’s) polis cu fiscal tin un autoridad discretionario pa dicidi di bay over pa cera e chaffeur of laga bai cas bou di cierto condicionnan. "E no ta inusual pa laga hende bay cas bou di cierto condicion nan" Wix a bisa. De hecho, esaki ta conta pa cualkier otro habitante. Esta cu si esaki a sosode cu cualkier otro persona, tambe e lo por a haya e mesun trato bou di e mesun conditionnan. E hecho cu,- segun Wix-, e persona ta abogado no ta cambia e asunto ningun momento y no tawata tin niun influencia riba e decision di polis/fiscal pa lag'e bay cas. Esey no ta hustifica e hecho cu de Hoogd a comete un infraccion pa cual e lo haya un castigo apropia mescos cu tur otro hende den un situacion asina. Pero aki tambe, mirando cu ta prome biaha y cu e daño ocasiona no tabata di 'gravedad', polis ta tuma esaki tambe na consideracion. Pues segun Wix, no ta asunto cu ta 'praat' e asunto aki 'goed' tampoco. E abogado a viola ley y e lo haña un castigo pa esey mescos cu tur otro ciudadano cu viola ley. NOTA: Foto ta cortesia di 24ora.com