OM: No tin indicacion cu Otmar Oduber a comete algo illegal den caso Dexacol

ORANJESTAD - Den un carta di ministerio publico na minister Otmar Oduber fecha 22 di april 2016, ta informa e mandatario cu relaciona cu un denuncia haci pa partido MEP riba e proyecto agricultor cu a haya e apodo di 'strawberry gate', indicando cu e mandatario lo a comete acto ilegal hunto cu e persona liga na e proyecto (cu awe ta cera na KIA)  'no tin indicacion cu a bin dilanti cu minister Oduber y/of un of mas otro ambtenaar emplea na e oficina di minister Oduber, DLVV/Santa Rosa y Directie Financien lo a comete un of otro acto castigabel pa ley'. E investigacion a dura 2 aña. E mandatario mesora a sali dilanti pa mustra cu un biaha mas intento di partido opositorio a fracasa. Mientras cu e mandatario a publica parti di e carta, a opta pa no publica e carta completo 'pasobra e ta un carta personal, y si mester di mas informacion mester check cu Ministerio Publico'. 

SCREENINGS UNIT

Segun Oduber, loke cu ministerio publico ta referi na dje tambe ta e eventualidad pa crea un tipo di screenings unit pa tur hende cu tin cu firma cu clientenan den exterior por wordo pasa door di e proceso aki, pasobra aworaki no tin esey. Un otro motibo cu e mandatario no kier a publica e carta completo, ta pasobra tin nomber di otro hendenan aden y e no ta kere cu ta prudente pa haci tal e ora. 

REACCION DI MEP

E lider di e fraccion di e partido MEP a reacciona riba e resultado di e investigacion. Segun Wever, MEP a tuma nota di e declaracion di minister Otmar Oduber cu segun e, e strawberry gate, ta keda pa pasado. " Pero e minister ta lubida cu e tin hopi splicacion pa duna pueblo ainda" Wever ta bisa. A sigui repasa e loke a conduci na kico e caso segun MEP, mes tabata. Segun Wever, si Oduber kiermen cu e no a haci ningun acto criminal, ainda e falta di duna hopi splicacion si pa pueblo. Pasobra cu Ministerio Publico no kier persigi'e, no ta nada straño." Pero Otmar Oduber no por kere cu e cos a caba akinan. Otmar Oduber ainda falta pa duna cuenta na pueblo kico su relacion ta cu sr. Ospino Span y dicon el'a pone presion riba Santa Rosa pa paga sr. Ospino mesora, sin warda siquiera un mata di strawberry wordo planta" Wever a sigui bisa. " Pasobra un cos ta sigur, mientras cu e minister a privilegia su amigo, pueblo a paga 11 mil dollar y ken sa cuanto mas, y ningun dia un strawberry a wordo planta na Aruba! Y si Otmar Oduber ta bolbe pensa di ripiti cu 11 mil dollar ta un suma hopi abou, pensa dos biaha cuanto famia no tin ni 10% di e suma ey! Ta placa di pueblo y e mester duna cuenta na pueblo. Tribunal penal no kier actua, pero tribunal di pueblo si" Wever a finalisa bisando.