Hombernan bisti na polis cu uzi a intenta di comete atraco

PALM BEACH - Hombernan bisti na polis cu arma ala uzi, a drenta un cas na Opal (West punt) diahuebs anochi pa tira un atraco, pero no a logra bay cu nada. Segun vocero di polis Liliana Rasmijn, ta trata di dos homber cu tabata papia spaño cu pa 8:35 pm a drenta e cas. Lo remarcabel tabata e hecho cu nan tabata bisti na uniform di polis local, completo cu carson y camisa (blauw) y e petchi di polis, pero tambe cara tapa. E arma cu nan a uza, segun Rasmijn, tabata parce un uzi. Despues polis a logra haya e pañanan cu e ladronnan a uza den e intento di atraco.