Bonaire ta drenta fin di siman cu inseguridad riba su gobierno

KRALENDIJK - Pa falta di quorum, un reunion importante di Eilandsraad na Bonaire no por a tuma lugar, lagando e isla den un incertidumbre pa loke ta su situacion gubernamental. Esaki despues cu parlamentario Esther Bernabela lo a laga su sosten cay pa UPB. Esey a pone cu na comienso di dia tabatin rumornan persistente cu gobierno di e isla a cay. Pero esey no tabata e caso. "Gobierno no a cay" tabata e reaccion di gezaghebber Edison Rijna pa NoticiaCla.com diahuebs atardi. Segun gezaghebber, e reunion di eilandsraad lo continua diamars awor. E ora ta spera di haya claridad. 

FALTA DI QUORUM

E problema di quorum diahuebs anochi tabata pasobra cu Bernabela no a presenta. Fuera di Bernabela, a compronde cu 3 miembro di MPB tambe no lo no a presenta causando e problema di quorum. Segun lider di e partido MPB, Elvis Tjin-Asjoe na NoticiaCla.com, e ta considera cu tin un crisis den gobierno di Bonaire. Pero no awo so."For di inicio di e coalicion aki. Pa basta tempo" Tjin Asjoe a bisa cu ta papiando di crisis. 

CARTA DI UPB

Mientras cu rumornan persistente tabata papia di un caida di gobierno, informacion cu gezaghebber lo a ricibi un carta di UPB cu nan ta 'revoca' nan sosten na e coalicion a keda rechasa. "Te awor, ningun carta a yega cerca mi" Rijna a sigui bisa NoticiaCla.com diahuebs anochi. Hecho ta si, cu tin un incertidumbre riba e situacion di gobierno na Bonaire, y cu e isla di flamingo ta drenta un fin di siman largo di incertidumbre. Un incertidumbre cu (si no bin algo prome), lo mester haya claridad ora cu e reunion cancela di awe, tuma lugar diamars awor pa 7'or di anochi, segun gezaghebber.