Firmamento di protocol AZV no a sigui diahuebs mas

ORANJESTAD – E firmamento di e documento conoci como e ‘protocol di AZV’  (lesa e protocol aki )cu mester a tuma lugar diahuebs atardi, a keda posponi pa otro siman dialuna of diamars. Asina e representante di gobierno, Bart Kool a confirma na NoticiaCla algun rato despues cu e evento a cancela. Segun Kool, ta trata di un ‘conflicto di agenda di ministernan’ cu a pone cu nan no por a bin na e reunion mas. Di otro banda, representantenan di gremio sindical y comercial si a presenta, pero a bin tende tambe cu no tin mas firmamento. E momento ey nan a opta pa tambe bandona e sala y keda pendiente.

Segun Kool, a dicidi e ora cu ta miho pa cancela e meeting pasobra toch a purba warda e ministernan yega ainda ya cu e gremionan tabatin un rato ta warda caba. Pero a cancela esaki. Contrario na pensamento posibel segun Kool, no a firma pasobra no tabatin acuerdo pasobra e parafnan a wordo poni caba door di varios gremio. Tin gremio si, cu segun Kool a indica delanta si cu, cu nan lo no a bay firma e protocol. “Esey por pasa. Pero no ta asina cu nos no ta cla cu e protocol” Kool a sigura NoticiaCla. E ta mas bien un ‘ceremonia protocolario unda cu nos ta invita tur hende pa bin akinan” Kool a bisa.

No por a duna un fecha fijo, pero ta kere cu mas sigur dialuna of diamars lo sigui cu e firmamento di e protocol. “E lo bira un meeting chikito, mas bien un formalidad” Kool a sigui bisa.

Manera cu NoticiaCla a raporta caba, tabatin hopi interes pa e protocol cu gremionan comercial y sindical mester a firma diahuebs atardi, pa aumenta e prima di AZV cu 1%. E ta wordo yama ‘e protocol di azv’ pasobra mayoria di e 23 puntonan den e protocol ta referi na cambionan cu tin cu tuma lugar pa cu AZV. (Lesa e protocol aki) Entre nan e aumento di prima, aunke cu e nomber di e aumento a haya un nomber diferente. Manera cu NoticiaCla a raporta caba, ta trata di un asina yama ‘bestemmings belasting’ di 1% cu tin cu wordo introduci pa comienso di september di e aña aki ainda. “Nos ta trahando duro pa e ley aki keda cla” tabata comentario diaranson di minister di salud Alex Schwengle. Pa evita cu lo por abusa di e impuesto aki, lo a pone un clausula cu ta mara cada negoshi pa marca e impuesto specificamente aki riba cada recibo claramente.

Loke tabatin gremionan (primordialmente esnan di comercio) precupa, ta e garantia cu e ‘belasting’ aki berdaderamente lo por wordo destina pa AZV y e garantia pa cu esey. Y si esaki enberdad ta wordo aloca pa AZV, pero mas importante ainda, bou di ki post. Gremionan cu NoticiaCla a papia cune ta mustra cu nan no ta sinti cu ta husto cu gobierno ta bolbe aumenta e peso riba e pueblo, mientras cu den e aparato gubernamental no ta cortando suficiente ainda. Esey ta pues pone cu tanto algun gremio comercial como sindical tabata resisti contra e idea di firma e protocol diahuebs atardi.

Manera cu NoticiaCla a raporta tambe, algun di e gremionan ta considera cu e aumento aki, ta nada menos cu un BBO camufla, y a ‘duna e bestia un otro nomber’, manera e dicho popular hulandes ta bisa. “Dificil nan por yame BBO pasobra a campaña contra esaki den eleccion” un miembro di gremio comercial a confia na NoticiaCla. Loke tin nan tambe precupa ta cu dependiendo di e suma genera pa e 1%, e por te hasta cubri parti di e ‘landsbijdrage’, cu ta pone cu defacto gobierno ta uza pueblo atrobe pa ‘yuda’ financia e parti di landsbijdrage, esta e parti cu gobierno tin cu aporta cune. Algo cu indirectamente caba, e pueblo ta pagando.

Manera NoticiaCla a raporta anteriormente, segun un nota cu NoticiaCla a obteni, e impuesto extra di 1% cu AZV a yama ‘health tax’, mester genera por lo menos 21.2 miyon florin den e ultimo tres luna di aña 2014. Pa 2015 esaki ta aumenta te na 63.8 miyon pa e aña completo y finalmente na 2017 esaki ta bira 69 miyon pa aña. Na tur calcula, e tin cu genera pues entre 5 pa 7 miyon florin extra pa AZV tur luna.

Politicamente, e partido mas grandi di oposicion ta considera e zet di firma otro protocol yena cu compromiso, como algo ilogico si tene na cuenta cu tin un comision (College Financieel Toezicht) cu ta investigando e presupuesto di pais Aruba y cu mester bin cu su resultado fin di luna awor, cu por ensera varios ahustacion y medida. Medidanan cu lo por converti combenionan nobo firma, como obsoleto. Esey ta pensamento di por lo menos e partido politico den oposicion MEP.