Bon reunion a evita posibel accion na aeropuerto e weekend aki

ORANJESTAD - E resultado di e reunion entre Triple A y sindicato STA a bay di tal forma cu partidonan ta papiando ainda te cu a pone un fecha pa mas combersacion dia 19 di mei proximo. "AAA NV ta meet STA halverwege", presidente di e sindicato Diego de Cuba a sigura NoticiaCla.com despues di e reunion di mainta. Esey ta nifica tambe cu no tin menasa mas pa accion den fin di siman na aeropuerto. Kico e detayenan ta, ta keda divulga despues, pero e importante ta cu no tin menasa di accion mas. 

SITUACION TENSO MAINTA

Manera NoticiaCla.com a raporta awe mainta, e  situacion laboral na aeropuerto tabata asina tenso, cu si no a bin un cambio di parti di gerencia di Triple A NV, den e reunion awe mainta 'por a spera accion e fin di siman aki' na aeropuerto. Asina e presidente di e sindicato (STA) cu ta representa e trahadonan, esta Diego de Cuba a bisa NoticiaCla.com awe mainta prome cu el a drenta den reunion cu e gerencia pa trata e CAO. Segun de Cuba, e trahadonan a haci un peticion pa cu e CAO nobo, y cu si gerencia no duna aden, tin problema. 

PROBLEMA DI PENSIOEN

Tabata apenas un siman cu Noticiacla.com a raporta riba e situacion laboral di AAA NV unda cu e problema actual ta e asunto di pensioen. Segun presidente di e sindicato representativo STA, Diego de Cuba a splica e portal siman pasa, e ta algo cu pa añanan ta discutiendo ariba. E problema ta cu durante negociacion biaha pasa a palabra cu pa e negociacion aki mester hiba tur hende APFA, en bes di Guardian. Como tal tur cos cu firma cu e compania Guardian, mester tin un clausula pa por bula afo na tempo ora cu bay pa APFA.

AAA NO A ZEG OP GUARDIAN

E problema sinembargo ta cu, -segun de Cuba a bisa siman pasa-, AAA no a 'zeg op' esaki na juni 2015. Esey a pone cu tin dos caminda cu por cana awor. A compronde di de Cuba cu mayoria di trahado (di Triple A) kier bay APFA. Y si sigui e plan di bay APFA sin mas, ta hinca Triple A den un spot unda cu Guardian lo hiba AAA NV corte pa incumplimento di contracto. "Triple A por hay'e ta paga e ora casi 3 miyon florin. Nos a bisa cu nos kier un salida pa e problema aki y lo papia cu e miembronan awor" de Cuba a bisa e momento ey. Segun e sindicalista, a sinti pa masha tempo cu tabatin un problema y cu e compania tabata scondiendo algo pa nan.