Fundacion Lisette Gomes a distancia su mes di destruccion na Parlamento

ORANJESTAD - Fundacion Lisette Gomes:Stop Abuso Sexual di Mucha & Grupo Aruba Speak Up Louder #AUA427 a distancia nan mes di e sucedido den oranan laat na porta di Parlamento y di tur otro vandalismo cu por a tuma lugar den e ultimo dia nan aki. Asina e fundacion a laga sa diahuebs merdia pa medio di su presidente Lisette Gomes. Segun Gomes den un comunicado, "E sucedido aki no tin nada di haci cu nos manifestacion y e entrega di manifiesto na tanto Vice Presidente di Parlamento como tanto na Gobierno".

LAMENTO

Ademas nan ta lamenta profundamente con un otro grupo(nan) y persona(nan) ta haci uzo di nan manifestacion pa trece dilanti nan punto di bista den e forma aki. " Tambe nos ta yama danki na tur esnan cu a uni nan mes na nos manifestacion, tanto na hende nan grandi, hoben y chikito cu a participa den un forma pasivo y cu respet", Gomes a sigui bisa. 

GRADICIMENTO

Nan a finalisa nan comunicado gradiciendo gobierno, den persona di ministernan Arthur Dowers y Paul Croes cu ya ta stipulando un fecha pa sinta cu nos na mesa, discuti e problematica y trece cambionan necesario den nan maneho. " Nos ta yama danki tambe na Cuerpo Policial cu a reuni cu nos di antemano pa discuti tur cos y a sa mantene orden publico. Cada un mucha abusa sexualmente ta uno di mas!!!" Gomes a finalisa bisando den su comunicado.