Posibel accion na aeropuerto den fin di siman

ORANJESTAD - E situacion laboral na aeropuerto ta asina tenso, cu si no bin un cambio di parti di gerencia di Triple A NV, 'por spera accion e fin di siman aki' na aeropuerto. Asina e presidente di e sindicato (STA) cu ta representa e trahadonan, esta Diego de Cuba a bisa NoticiaCla.com awe mainta prome cu e drenta den reunion cu e gerencia pa trata e CAO. Segun de Cuba, e trahadonan a haci un peticion pa cu e CAO nobo, y cu si gerencia no duna aden, tin problema. 

PROBLEMA DI PENSIOEN

Tabata apenas un siman cu Noticiacla.com a raporta riba e situacion laboral di AAA NV unda cu e problema actual ta e asunto di pensioen. Segun presidente di e sindicato representativo STA, Diego de Cuba a splica e portal siman pasa, e ta algo cu pa añanan ta discutiendo ariba. E problema ta cu durante negociacion biaha pasa cu pa e negociacion aki mester hiba tur hende APFA, en bes di Guardian. Como tal tur cos cu firma cu e compania Guardian, mester tin un clausula pa por bula afo na tempo ora cu bay pa APFA.

AAA NO A ZEG OP GUARDIAN

E problema sinembargo ta cu, -segun de Cuba a bisa siman pasa-, AAA no a 'zeg op' esaki na juni 2015. Esey a pone cu tin dos caminda cu por cana awor. A compronde di de Cuba cu mayoria di trahado (di Triple A) kier bay APFA. Y si sigui e plan di bay APFA sin mas, ta hinca Triple A den un spot unda cu Guardian lo hiba AAA NV corte pa incumplimento di contracto. "Triple A por hay'e ta paga e ora casi 3 miyon florin. Nos a bisa cu nos kier un salida pa e problema aki y lo papia cu e miembronan awor" de Cuba a bisa e momento ey. Segun e sindicalista, a sinti pa masha tempo cu tabatin un problema y cu e compania tabata scondiendo algo pa nan.