Incidente 'serio' den partido a pone un miembro retira di partido MEP

ORANJESTAD - Un incidente 'serio' cu a sosode den partido MEP recientemente entre e miembro Gerick Croes y e partido heel a pone cu Croes no ta forma parti mas di e partido. E partido ta referi na e salida di Croes como un 'retiro boluntario' mientras cu e speculacion ta cu Croes lo por a causa malversacion di fondonan di e partido. Croes mes a manda un relato pa algun medio riba su salida repentino di e partido. "Diferencia di opinion" ta e motibo duna pa Croes, mientras cu lider di e partido Wever ta papia di 'algo serio cu a pasa', pero no kier bay den mas detayes. Partidonan lo a yega na acuerdo pa tene e asunto 'interno'.

REACCION DI CROES

Segun Croes, e ta confirma cu e no ta forma parti mas di e partido, 'a raiz di diferencia di opinion entre su persona y directiva. Y pa motibo personal el a entrega su retiro'. A gradici tur hende cu a sostene for di su entrada na 2013. Mes momento Croes ta cancela e rifa cu e tabata responsabel pe, di "Walt Disney Dream Vacation" valido pa october di e aña aki. No ta conoci si esaki tin di haber cu e problema. 

REACCION DI LIDER DI MEP

Lider di partido Evelyn Wever Croes riba pregunta di NoticiaCla.com cu si ta trata enberdad di un caso di malversacion, Wever a contesta:" "Locual a pasa ta algo serio y ta cu duele mi mester bisa cu esey a pone nos camindanan parti y a conduci na su retiro. Nos a yega na palabracion cu e motibonan nos ta tene interno y ami ta tene ni mes na e palabracionnan y mi ta spera cu bo por respeta esey".