GOMES: Gobierno den menos di 24 ora a reacciona na e manifestantenan

ORANJESTAD - Den menos cu 24 ora di e manifestacion, gobierno a contesta e fundacion Lisette Gomes diaranson anochi riba e manifestacion entrega mas prome na e gobernantenan. Asina Gomes mes a bisa NoticiaCla. A bisa cu tabata masha contento cu e resultado lihe aki, mirando cu en berdad nan a pidi gobierno pa un reaccion y solucion den 30 dia. "Pero ya awe nochi nos a haya un carta di ministernan cu nan lo sinta cu nos, aunke un fecha exacto no a wordo duna" Gomes a bisa. Mas sigur esaki lo ta e prome siman di mei, esta posiblemente otro siman caba. 

E MANIFIESTO

E manifiesto entrega diaranson merdia/atardi, a atende gobierno riba 10 punto cu no ta funcionando den e sistema, y considerando esey, a urgi gobierno pa tene cuenta cu 5 punto specifico cu nan ta menciona den e manifiesto y ta duna gobierno 30 dia pa bin cu un of otro contesta/solucion. E reunion ey, lo tuma lugar awor otro siman probablemente caba. 

E MANIFESTACION

Entre 150 y 200 persona a marcha pa protesta contra abuso sexual contra mucha diaranson merdia. Riba un orario mas tempran cu normal (2:30pm), e grupo di persona bisti na preto, y cu pancarta y algun cu un velo preto na cara, a marcha prome pa Parlamento y despues pa Bestuurskantoor. Notabel tabata hopi cara cu normalmente no ta participa den protestanan, e biaha aki tabata presente. Tambe notabel tabata e cantidad di hoben cu tabata presente. Un manifestacion mas sereno, sin musica, a cuminsa tempran y caba tempran. A entrega un manifiesto na vice presidente di Parlamento Chris Dammers y minister di asuntonan social Paul Croes, compaña pa minister di husticia Arthur Dowers. Despues di a lesa un lista di exigencia y sugerencia pa e mandatarionan respectivo, a duna nan tur 30 dia pa bin cu un contesta.