Operacion Cunucu a yega capacidad maximo di cacho riba prome dia!

ORANJESTAD - E grupo di 20 veterinario di Animal Balance hunto cu un cantidad di 30 boluntario local a keda sorprendi cu e prome dia di Operacion Cunucu. Un total di 106 cacho a keda treci riba e prome mainta Shelley Chadwick cu ta lidera Operacion Cunucu a confirma na NoticiaCla.com diamars mainta. "Nos a kere cu hendenan lo bin poco poco pa aclimatisa, pero nos no a kere cu e lo bay ta asina grandi prome dia caba" Chadwick a bisa.

OPERACION CUNUCU

Operacion Cunucu ta un iniciativa local y internacional pa logra sterilisa un total di 500 cacho di caya den 6 dia di tempo. Un total di 20 veterinario y tecnico a yega Aruba siman pasa y a prepara tur cos cu ayudo di un ekipo grandi di Aruba pa awe cuminsa sterilisa cachonan na Aruba completamente gratis. E intencion tabata pa hendenan trece cacho pa e centro temporal na ex Centro Dakota, y despues busca nan bek y pone nan bek riba caya. Tambe un team lo a subi caminda pa na cierto area piki cacho y trece nan aden tambe. 

CAMPAÑA PUBLICITARIO

Aparentemente e campaña publicitario a funciona grandemente cu a pone cu ya riba e prome dia e team a haya nan cu 106 cacho (90 cacho di Playa y 16 di San Nicolas ). "Nos ta na full capacidad caba riba e prome mainta" Chadwick a bisa. A mustra cu si sigui asina, lo nan no tin suficiente material pa sterilisa ya cu nan a bin cu material pa 'apenas' 500 cacho. Si riba e prome dia nan logra 100 caba, y riba un dia di trabou, esey ta mustra cu nan lo surpasa e cantidad di cacho y cu nan lo no tin suficiente material pa tur. E intencion awor ta pa prepara un di dos posibel tanda den futuro, pa poco poco elimina e problema di cacho na Aruba.