Brandweer ta sospecha cu tin hopi klapchi scondi ainda

ORANJESTAD - Brandweer ta sospecha cu tin hopi klapchi scondi ainda. Siman pasa a tuma luga e prome reunion di e comision di vuurwerk na kazerne di Brandweer na Tanki Flip pa evalua con e temporada a bay y kico tur lo tin cu tene cuenta cu ne pa e siguiente temporada. Frido Dirksz di Departamento di Prevencion di Cuerpo di Bombero como tambe miembro di e comision di vuurwerk ta considera cu en general tin mehoracion den e maneho, pero semper tin detayenan chikito cu mester drecha y ta e motibo di e reunionnan aki.

CANTIDAD DI PETICION

Un total di 22 peticion pa importacion di klapchi a drenta na aña 2015 di cual 4 a perde nan vergunning, nan a wordo “ingetrokken”, cu na final a bira un total di 18 container di 40 pia cu vuurwerk nobo cu a drenta. Tin cu conta acerca e 7 containernan cu a resta di e temporada anterior, cu ta suma na total 25 container riba mercado. Frido Dirksz a sigui conta cu for di DOW nan a ricibi informacion cu ta unicamente 3 container so a drenta bek for di e total aki cu a subi mercado. 

VUURWERK SCONDI AINDA

Cu esaki Cuerpo di Bombero ta asumi cu lo tin vuurwerk scondi of warda riba caya di cual nan tin tur atencion y preocupacion pa e situacion. Investigacion lo tin cu constata esaki cu tur su consecuencianan pa esunnan cu ta haci nan mes culpabel di e delito di warda klapchi. Ta conseha e comerciantenan cu lo tin vuurwerk scondi pa nan pensa bon pa evita cu nan ta perde tur cos, tanto e mercancia como permiso di cual nan no lo bini mas na remarca.

COMERCIANTE MAS RESPONSABEL

Frido Dirksz a enfatisa cu cada comerciante mester ta mas responsabel, no solamente cu benta y entrega, pero tambe cu e cantidad di vuurwerk cu e ta importa. Si e cantidad ta surpasa e expectativa bo ta core riesgo di keda pega cu nan. Si e comerciante limita su mes na un cantidad mas rasonabel y na e calculacion di e temporada anterior, lo evita gasto innecesario. Lamentablemente esaki no ta asina y ta nota cu a importa un cantidad mucho mas halto di locual tin demanda p'e. Asina por ehempel tin importadornan cu tur aña ta importa 2 container, pero diripiente a aumenta e cantidad na 4 container. 

CONTROL AÑA PASA

Durante control aña pasa a constata cu a traha stickernan pa asina camufla e fecha di fabrica cual riba su mes ta un delito y di cual por ricibi sancion, pero ta trece peliger pa e consumidor cu no ta na altura cu el a cumpra klapchi venci of cu lo ta defecto. E comision sigur lo tene mas control riguroso riba e tipo di actonan aki y ta conseha comerciantenan pa evita no solamente e impacto/perdida financiero, pero mas importante e peliger cu por trece na bida di hende. Brandweer ta apela na comerciante pa evita proces-verbaal y un sancion mas serio ainda, caminda cu lo no bin na remarca pa un permiso pa bende of importa klapchi den un periodo di 5 aña.