A presenta programa “Bo curason ta den bo man” na Aruba Bank

ORANJESTAD - Durante di un encuentro ameno na Camacuri Branch di Aruba Bank, Gino Goeloe, Director di Wit Gele Kruis Aruba a haci e presentacion oficial na Sharon Fränkel-De Cuba, Managing Director di Aruba Bank, Velma Daal di Aruba Heart Foundation y Mariaine Croes di Aruba Way Foundation, di e grabacion di e programanan “Bo curason ta den bo man” “Your heart is in your hands”, produci pa Richard Jacobs Jr. di Jacobs Production & Advertising.

CAUSA DI MORTO

E causa number un di morto na Aruba y na mundo ta relaciona cu enfermedadnan circulatorio. Un total di 33% di mortonan entre aña 2000 y 2016 ta relaciona na esaki tambe. Den cuadro di esaki Aruba Bank y demas fundacionnan a haci un aporte financiero na e campaña di conscientisacion di Wit Gele Kruis, pa informa nos comunidad con pa preveni enfermedadnan mortal (di curason/circulatorio). 

ARUBA BANK 

Aruba Bank ta un banco conoci pa su sosten na numeroso instancianan den comunidad Arubano y cu gusto a acepta e bunita presentacion final di e programanan aki cu lo por mira via Tele-Aruba tur diamars atardi.