Kioskonan 'di beton' ta facilita turistanan na otro beachnan di Aruba

ORANJESTAD - Den un intento pa crea areanan diferente di beach cu turistanan di p.e. bapornan crucero por disfruta na Aruba, gobierno ta trahando kioskonan practico awor. Nan ta facilidadnan pa baño, douche, come y bebe algo. Y pa duna un bista di tur esaki, minister encarga cu turismo, Otmar Oduber, a duna un 'tour' di esaki. Mes momento oposicion ta critica e 'obra' yamando esaki otro intento pa pone mas 'beton' riba tereno cu mester keda 'berde'. 

AREA CONGESTIONA

Segun e mandatario, no ta un secreto cu e demanda ta halto specialmente den e area hotelero. E area congestiona aki ta sinti un presion enorme na momento cu e  cantidad grandi di turistanan di e barconan crucero tambe kier disfruta di e beachnan. E motibo principal cu tur e turistanan ta concentra den un area specifico ta pa e cantidad di facilidadnan manera por ehempel baño, pa nan por dal un douche, di por come algo of bebe algo. Manera ta conoci e Beach Policy dentro di poco, pa prome di juli, ta drenta na vigor y parti di dje ta encera tambe pa crea diferente area unda e tour busnan lo por hiba nos bishitantenan di e barconan crucero na e otro opcionnan cu no ta crea e congestionamento manera a bin ta tuma luga. Pa loke ta e 'area di beton', manera cu oposicion a yama esaki, a splica cu a scoge pa construi e 'facilidadnan di beton' pa percura cu nos como producto Aruba keda riba e nivel di "Blue Flag", papiando di mantencion y di e calidad di beachnan. Proyectonan cu ta carga sosten financiero di tanto TPEF como tambe ATA, cu ta paga pa e solucion cu kier crea pa nos beachnan.