‘Faya bo haya’ pa weganan mundial di futbol

ORANJESTAD – Polis lo vigila e comportacion di comunidad durante weganan di futbol valido pa Copa Mundial hopi di serca. Esaki pa evita cu cos por bolbe sali for di man manera cu a sosode despues di e wega di futbol unda cu e ekipo di Colombia tabata envolvi. Cuerpo policial a mustra cu ta netamente despues di e wega aki, cu cos a bira fastioso y cu polis mester a actua mas cu normal. Esey a pone polis pensa cu no por keda man cruza pa e proximo wega di entre otro Colombia. Pero pa evita cu ta ‘mik’ riba e grupo di colombiano na Aruba, a opta pa vigila tur area durante tur wega di futbol, den e proximo dianan aki.

E control rigido, miho conoci como lik op stuk, of ‘faya bo haya’, ta e medida mas extremo cu polis por tuma ora cu e mester tene control di orden publico. Carnaval tabata un periodo unda cu polis tabata uza e medida aki frecuentemente. E biaha aki a opta pa aplica e medida aki durante e ultimo dos simannan di wega cu falta. Esey ta indica cu for di ora cu tin wega atrobe diabierna, e control di polis por cuminsa atrobe.

Vocero suplente di polis Liliana Rasmijn a splica e diferente reglanan cu ta na vigor. Mester enfatisa cu ta mal comportacion di fanaticonan mes a hiba na e decision aki, specialmente pasobra a insulta Polis, a bringa cu Polis y hasta un mucha a bira victima di maltrato fisico na man di un adulto. Despues di e diferente incidentenan aki, Polis a haya nan mes forsa pa introduci algun regla estricto hunto cu Ministerio Publico pa por garantisa cu un y tur por gosa den forma sano di nan weganan.

“Faya bo Haya” lo inclui listramento preventivo (preventief fouilleren) den tur bario rond di nos isla. Cu excepcion di Plasa Daniel Leo, no ta permiti pa haci uzo di caminda publico pa para pafo y stroba trafico. No ta permiti pa susha caminda cu boter y otro obheto. Na ningun momento ta permiti pa para auto na camindanan no permiti pa ley, incluyendo trottoir. Si para auto na camindanan no permiti polis lo laga kita esaki cu takelwagen y e doño di auto mester paga un boet y e tarifa di e takelwagen pa haya e auto bek. Si no busca e auto e mesun dia, e costo di Afl. 25 ta wordo añadi na e suma total pa dia.

Faya bo Haya pa e temporada aki ta basa riba e ley pa cu “samenscholingsverbod” y articulo 37 di APV. Cuerpo Policial ta pidi tur persona cu bebe bebidanan alcoholico pa no stuur auto y cu lo tin control di Polis tur caminda. Na tur actividad di Mundial tin mucha presente y Polis ta subraya pa adultonan presente corda riba nan rol como “rolemodel” pa nos hobennan y, entre otro, no insulta otro y no bebe di mas te perde sinti. Ta urgi pa tur hende corda riba nan rol como adulto responsabel, como mayor. “Mustra e muchanan cu weganan deportivo ta sano y no vulgar y destructivo”, asina Liliana Rasmijn a expresa cu enfasis.

Di otro banda, Lito Lacle, tambe di e departamento di Comunicacion, Informacion y Prevencion di Cuerpo Policial Aruba a splica cu riba caya lo tin entre otro e “Mobiele Eenheid”, e Unidad K9 y diferente patruya y teamnan special, manera ta e caso di Visibility Team. Polisnan lo ta activo y tur team lo ta riba standby durante tur e weganan te cu final di Mundial 2014, esta dia 13 di juli 2014.

Lo actua tambe na diferente luga unda cu negoshinan ta pone tent pa clientenan por mira wega pafo di e establecimento, pero cu no tin permiso pa esaki. Polis lo cera negoshinan cu no ta mantene na reglanan y no ta percura pa contribui na orden publico. Tur regla di Faya bo Haya cu tabata aplicabel durante Carnaval ta aplicabel tambe awor durante Mundial. Entre otro, si un persona wordo deteni e mester paga un boet pa recobra su libertad.

Cuerpo Policial Aruba ta haci e anuncio aki di e maneho di “Faya bo Haya” 48 ora prome cu e ta bay na vigor. E maneho ta aplicabel for di diabierna dia 4 di juli te cu diadomingo dia 13 di juli 2014.