Izaline Calister riba Reina di Pordon: 'Mi a gust'e asina m'a tend'e'

AMSTERDAM - E cancion nobo di Izaline Calister (47) cu Buleria, 'Reina di pordon' ta un colaboracion entre e cantante y e banda, manera cu a sosode den pasado entre Izaline y Grupo di Betico. Asina Izaline ta splica NoticiaCla.com riba e tema nobo. Mes momento e ta splica cu e cantica ta uno cu ta forma parti di su disco compacto number 8, esta "Rayo di Luz" cu otro luna ta keda estrena oficialmente. "Mi ta kier a haci algo cu un par di guest" e cantante di jazz contemporaneo Izaline a bisa. Y mirando e talento di Dwight Leoneta di Buleria, el a opta pa acerca e productor/cantante pa e colaboracion aki. 

COLABORACION CU DWIGHT 

Izaline, cu ta biba na Hulanda for di 1987 y a haya fama total cu su cancion 'Wow'i Cariño' algun aña pasa manera semper, tabata kier tin the best. "E (Dwight )Leoneta y Lisette Provacia a traha e cantica aki pami, cu mi a keda masha masha contento cu ne" Izaline ta sigui conta. E ta consider'e como un colaboracion cu Buleria. "Nan a toca y Ron Martis hunto cu mi ta canta. Mi a canta coro. Asina mi a join e banda". E cantica a wordo traha na Hulanda y Aruba. "E banda a graba na Aruba, supladonan a graba na Venezuela, ami a join cantando coro y e lead akinan y mi producer a mix y master henter e proyecto. E tabata un colaboracion internacional" Izaline ta bisa cu un sonrisa. Y e tempo cu e proyecto a tuma pa completa, tabata uno relativamente cortico. "Nos a traha bastante lihe" Izaline ta conta, splicando cu ta for di tempo di carnaval e aña aki a cuminsa cu e tramite. Ora cu Izaline a acerca Leonetta na februari cu e idea, el a haya e contesta di Leoneta cu 'e ta un proyecto great pero ta carnaval y ta 'hot', pues cu ta te mitar februari e (Leoneta) por a bin cu algo p'e." Ta te delaster siman di maart a keda cla y awor a lansa esaki" e cantante di Corsou ta sigui splica.

COMPARACION CU WOW'I CARIÑO?

E tononan di e cancion nobo tin un toke a la 'Wow'i cariño' cu hopi hende a gusta ora cu el a keda presenta na 2004 riba e CD 'Krioyo'. Algun comentarionan ta cu e cantica ta uno 'hot' y segun algun locutor a bay asina leu di yame un 'hit sigur'. Esey no kiermen cu esun nobo tin cu reemplaza e tema popular menciona si. "Tur ta den mi curason. Mi no tin cu deshaci di nada. Mi ta keda canta Wow'i Cariño tanten tur hende kier tend'e y mi ta keda skirbi cantica nobo pa mi trec'e pa amplia mi repertorio pa mi publico", Izaline a sigui conta. Wow'i Cariño ta keda un hit stima pa Izaline ya cu el a wordo skirbi hunto cu Randall Corsen, cu full su curason e tempo ey. "E tempo aki tambe. Mi a pidi Dwight skirbi'e pami. Pero si mi no a gust'e lo mi no a grab'e. Ta mi CD" e cantante ta sigui bisa. Pero, manera a resulta, e cantica a 'touch' su curason mesora. "Fo'i ora mi a tende riba computer, sin e banda, mi a gusta e cantica mesora! Ora cu mi a cant'e, mi a haci'e lihe y mi a sinti cu 'it was made for me!'" Izaline ta bisa. E ta considera Reina di pordon como parti di su cultura, parti di su ser. "Mi ta masha feliz". 

RAYO DI LUZ

Reina di pordon ta un di e 10 composicionan cu ta aparece riba e CD nobo di Izaline otro luna, esta Rayo di Luz. "Pa mi e ta un regalo pa mi hendenan cu ta en busca di un tiki luz den nan bida. Mi ta gusta positivismo, mi ta gusta luz, mi ta gusta hari. Mi kier trece esey den mi muziek". Y e ta un rayito di luz den radio pa e fansnan. "Nan (fansnan) ta pasa un 45 minuut contento, hunto cu mi. Canticanan cu tin ritmonan di nos. Mi tin tur cos riba dje" Izaline ta bisa, indicando cu e ta algo varia comercial, cosnan deep, algo di tur cos. Scucha Reina di pordon aki.