DIP:Terenonan na Boca Catalina ta marca masha tempo, pero no otorga

PALM BEACH - E mapa cu a keda publica pa e matutino Solo di Pueblo cu ta cuestiona cu e tereno na Westpunt conoci como Boca Catalina lo a wordo midi y cla pa wordo otorga, no ta berdad. Por lo menos asina e mandatario encarga cu infrastructura Benny Sevinger a declara na prensa siman pasa. Mientrastanto for di miembro di management team di DIP (Departamento di Infrastructura y Planificacion) esta Isabel Dammers, NoticiaCla.com a compronde cu 'e terenonan ey ta midi fo'i masha ten dus no cos di awo'.

TERENO MIDI PERO NO  OTORGA 

Segun Dammers, como ehempel por duna cu e numbernan 190, 192, y 193 a wordo midi for di 1973, mientras cu esun di 986 tabata un midi pa expansion di tereno pa un ciudadano eybanda, cu a wordo midi na 2000. Ademas Dammers a sigura cu mientras cu enberdad a midi e terenonan, 'nunca no a otorganan na ningun hende'. No a bisa si, cu ki intencion a midi e terenonan menciona, y kico lo kier a haci cu nan. Tur ta tereno pa uzo priva, y no comercial. 

REACCION DI MINISTER

E mandatario mientrastanto mes a laga sa cu ningun tereno cu ta wordo menciona, a wordo otorga y cu e no lo haci esey tampoco. Como tal e noticia cu a keda publica siman pasa pa e medio di prensa Solo di Pueblo cu a cuestiona e asunto aki bisando cu nombernan cu ta circulando eyfo, no ta berdad segun e mandatario y ta purba haci politikeria cu ne. NoticiaCla.com a compronde, pero no por a confirma cu un di esnan acusa cu lo a mester a haya tereno, a desmenti esaki categoricamente. E corant Solo di Pueblo a referi na un famia completo cu lo a haya esaki otorga, pero un di e miembronan di e famia lo a declara cu esaki no ta cuadra cu berdad.

MINISTER ODUBER

Minister di turismo Otmar Oduber ora cu a aserc'e riba esaki, no tabata na altura di e situacion. E mandatario a sigura NoticiaCla.com cu e no ta conciente di cualkier hotel of condominium cu lo por ta den plan pa area aki. "Te caminda cu ta conoci pa mi ministerio" e mandatario a bisa den su declaracion cortico siman pasa.