Sindicato di maestro SIMAR cu directiva nobo pa 2016-2018

ORANJESTAD - Diabierna ultimo SIMAR a tene su Reunion General Anual durante cual e directiva a relata tocante su trabounan eherci durante e aña sindical 2015-2016. Tambe miembronan presente a vota pa miembronan di directiva pa e siguiente dos añanan sindical, esta 2016-2018. 

Durante e reunion secretario a duna relato di tur trabou sindical, tesorero a duna relato di finansas di SIMAR, presidente a duna relato di e parti huridico di aña 2015 y relato di oficina di “accounting” cu a revisa e bukinan di SIMAR a ser presenta na miembronan.

Tambe a papia di e plan di accion pa loke ta 2016-2018 y e miembronan presente a vota pa e miembronan di directiva cu lo guia SIMAR durante e siguiente periodo cu ta 2016-2018.

Di un directiva saliente e miembronan ta automaticamente re-eligibel.  Comisario/vice presidente, esta Sra. Carolina Kelkboom no a pone su mes disponibel pa e siguiente periodo, mientras demas miembronan  y miembro  Sr. Carlos Martinus a pone nan mes disponibel pa eleccion. Miembronan presente a pone confiansa den tur e cinco miembronan cu a postula nan mes cu a ricibi e mayoria absoluto di voto y asina, segun statutonan di SIMAR, a haya e derecho di forma parti di e directiva nobo. 

Miembronan di directiva cu lo guia SIMAR durante e siguiente dos añanan ta (d.r.p.d) Sra. Maroeschka Cornelie, Sra. Natalie Carlo, Sr. Carlos Martinus, Sra. Sheila Lazo-Tromp y Sra. Mariela Kelly-Maduro. 

Den transcurso di siman e directiva lo reuni pa asina delibera tocante e funcionnan den directiva y lo anuncia esaki na miembronan y den prensa.  Un danki ta bay na Sra. Kelkboom pa su trabounan eherci durante e ultimo añanan y un palabra di exito, forsa y perseverancia ta bay na cada un di e miembronan di e directiva nobo pa carga e responsabilidad grandi pa guia SIMAR, e unico sindicato di maestro aki na Aruba.