Por lo menos 4000 persona a bishita prome Expo Labor

ORANJESTAD - E prome Expo Labor a resulta mas grandi cu e propio organisadornan a spera. For di tempran por a nota un aglomeracion grandi di hende cu a acudi cu e intencion di posiblemente sigura un trabou of por lo menos haya informacion necesario pa un trabou. Cu e detaye di tin 'free parking' pa un seccion di e area, esaki a yuda genera aun mas interes di personanan. Mester bisa si cu pafo di e area anuncia, varios persona a haya nan auto geklem si, ya cu nan a parkeer 'pafo di e zona'. E mandatario encarga cu labor, Paul Croes tabata hopi contento cu e resultado. 

4000 BISHITANTE

Segun cifra suministra pa e oficina di e mandatario, tabatin por lo menos 4000 hende cu a acudi riba e dia na e expo. Croes a mustra hopi satisfaccion cu e animo desplega pa Arubianonan construyendo nan futuro. "Arubianonan ta hende balente. Esey awe a wordo reitera. Esaki ta parti di pakico pueblo ta paga mi salario y mi ta demasiado satisfecho cu e resultado. E entusiasmo a sorprendemi, pero mi ta sumamente contento. Si 400 persona por logra un empleo e ta un injection importante den nos economia", Minister Paul Croes a bisa. 

VARIOS PRESENTACION 

E presentacionan tambe a resulta exitoso. Cientos di hendenan a yega y a scucha e informacionan presenta. Un animo impresionante riba Expo Labor. "Mi lo laga haci un evaluacion di henter e evento, pero ya caba mi ta sinti e necesidad cu nos mester bolbe organisa esaki", Croes a declara.