ABC Tours: Biento y visibilidad posibel factor pa accidente siman pasa

ORANJESTAD - Biento y visibilidad posibel factor pa accidente siman pasa. Asina e compania cu tabata envolvi den un accidente siman pasa, a indica den un comunicado " ABC Tours su prioridad ta pa cu siguridad y bienestar di su pasaheronan. E jeepnan envolvi ta di ABC Tours, y den un comunicado ta splica kico a pasa unda algun di su jeepnan tabata envolvi den un accidente cu turista, a reacciona den un comunicado.  Manera ta conoci, den oranan di atardi riba diahuebs 21 di april 2016, un accidente a tuma luga cu un jeep di ABC Tours na unda tabatin ocho pasahero di cual cinco a sufri algun rasca y tres, a wordo hiba hospital pa evaluacion medico. Elaborando mas riba e accidente ABC Tours ta duna su relato di loke a pasa.  

DETAYES DI E ACCIDENTE

For di declaracionnan di esnan envolvi den e accidente, pero tambe uzando e data graba for di e sistema di GPS, e compania a relata cu lo siguiente a tuma luga:"  Pa cuminsa e caminda unda e accidente a tuma luga ta un caminda di santo cu ta rasonabelmente safe. Na dado momento rafaganan di biento fuerte a lanta un cantidad inmenso di santo y stof riba caminda. E chauffeur di nos compania cu tabata maneha e ultimo jeep den e tour, un trahador cu añanan di experiencia den nos compania y cu un track record excelente, a perde visibilidad y a baha su velocidad. Haciendo esaki sinembargo e vehiculo, a dal den e parti smal di e caminda di santo y a bolter. Ocho persona tabata den e jeep, esey tambe ta e capacidad maximo di e vehiculo. Cinco pasahero a wordo herida, tres di nan mester a bay hospital y a wordo acompaña tambe pa un representante di ABC Tours te na momento cu nan mester a subi nan barco crucero mesun dia bek. E dos otro pasaheronan herida a dicidi pa sigui cu e resto di e tour, maske cu a conseha nan pa tuma tratamento medico, algo cu ta parti di e procedura fiho di ABC Tours pa cu situacionnan aki". Te aki e relato di e compania riba e suseso mes.

SEGURIDAD PROME LUGAR

E compania a sigui mustra cu como compania cu desde 1996 ta specialisa den tours cu jeep, ABC Tours semper a pone siguridad na prome luga pa su clientenan y staf. "Cada biaha ora nos sali cu turista, no solamente reputacion di nos compania, e producto turistico di nos pais ta den wega, pero mas importante ainda e bida di cada pasahero y tripulante di ABC Tours". Esaki kiermen cu por ehempel nunca ta desvia for di e camindanan cu ta designa pa core riba dje, y e caravana ta conta cu un sistema di GPS cu ta graba y monitor en bibo e trayectoria y velocidad di e vehiculo. ABC Tours a sigura cu tin faha di seguridad instala te den asientonan patras di tur nan jeep y prome cu cada tour sali ta percura pa tur pasahero tin nan faha di seguridad bisti. Tur nos jeepnan tin roll bars y ta “up to date” den mantencion y keuring. Usuarionan tin opcion di core nan mes of wordo cori". ABC Tours ta un di e poco tour operator na Aruba cu ta segura cada pasahero na Aruba y Merca contra accidente. Tur nos chauffeurnan sa cu si nan core iresponsabel, nan ta haya accionan disciplinario y por perde nan trabou. Hecho ta keda sinembargo cu, maske cuanto precaucion bo ta tuma como tour operator consciente, accidente semper lo por pasa". 

GRADICIMENTO

ABC Tours a gradici di curason e cuerpo policial, park rangers, brandweer y ambulance pa nan asistencia, mirando tambe cu e accidente a tuma luga na un caminda unda nan vehiculonan no por a yega asina facil. Tambe na hospital Dr. Horacio Oduber cu a atende e pasaheronan den forma eficiente y a certifica cu nan ta bon di salud y den condicion pa por sigui cu nan biahe riba crucero, cu tabata riba e mesun dia.