St Maarten tin e miho aeropuerto di Caribe segun Caribbean Journal

PHILLIPSBURG - E portal di turismo caribense Caribbean Journal (CJ) a nombra St Maarten como e miho aeropuerto den Caribe. Criteria pa e top 10 di e aeropuerto den Caribe (Aruba ta na # 3) ta facilidadnan cu ta haci e experiencia di e pasahero mas relahante. Entre nan e parti estetica, opcion pa F&B, shopping, y e nivel di servicio na cliente. Y aki e aeropeurto di St Maarten, Juliana Airport ta gana segun e portal. 

ST MAARTEN

CJ ta considera e aeropuerto moderno, bon maneha cu e loke nan ta considera e miho duty free shopping. E sistema bon maneha di imigracion, pero mas ainda e forma con e ta funciona como un hub Caribense, ta e motibo pa e premio aki di "Aeropuerto di Caribe pa 2016" 

ARUBA

Mes momento Aruba ta figura den e top 10 na numero 3. E ta un di e poco hubs cu ta ofrece 'pre clearance'. Y na december e la bira e prome isla den Caribe cu ta ofrece digital embarcation y ecards pa biaheronan cu yega Aruba. E adkisicion di free WIFI e aña aki sigur a yuda e aeropeurto su chens pa ta den e top 10. 

CORSOU

CJ ta referi na e aeropuerto di Corsou como e cas di e di tres pista di aterisahe comercial mas largo di Caribe. Ta papia di e renovacion multimiyonario recien, y un anuncio pa expansion di un terminal grandi poni pa completa na 2018, e ta suficiente pa ta den e top 10 (Corsou ta na # 9). E otro islanan ta Antigua #2, Nassau #4, Punta Cana # 5, Puerto Rico # 6, Cancun # 7, Cayman Island #8, Martinique # 10.