Minister no ta na altura cu a marca terenonan na Boca Catalina

PALM BEACH - E hecho cu lo a marca e area dilanti y riba Boca Catalina manera cu e matutino Solo di Pueblo a publica diahuebs, a hala basta atencion. Sigur di habitantenan eybanda, y tambe cierto gremionan. E informacion segun e matutino ta cu via un mapa, ta mustra cu henter e strip na Boca Catalina lo a keda marca pa verkavel y lo ta pa bende esaki cu cierto personanan. Minister di turismo Otmar Oduber ora cu a aserc'e riba esaki, no tabata na altura di e situacion. NoticiaCla.com no por a verifica si e mapa ta uno real y cu en berdad a wordo pinta pa uzo. 

CLARIFICACION

Den un intento pa haya clarificacion, NoticiaCla.com a acerca e departamento di DIP y ministernan di planificacion y esun di turismo. E unico cu a duna contesta tabata minister Otmar Oduber. E mandatario a sigura NoticiaCla.com cu e no ta conciente di cualkier hotel of condominium cu lo por ta den plan pa area aki. "Te caminda cu ta conoci pa mi ministerio" e mandatario a bisa den su declaracion cortico. Mester bisa si, cu no ta conoci si ta pa metanan hotelero, cu e terenonan lo a wordo marca.