Bon Bini Festival tin fondo pa sigui te fin di aña

ORANJESTAD – Bon Bini Festival ta continua, y tin fondo pa sigui cu e festival te cu fin di e aña aki. Y mes momento ta papia di cambia e localidad cu e tin awor, esta Fort Zoutman, pa un otro lugar. Esaki segun e director di Departamento di Cultura, Siegfried Dumfries. Tabata e siman aki cu diripiente a bin un nota cu ta pospone e festival te cu ‘proximo aviso’. Esaki a bin den mesun siman cu tabatin pregunta riba e funcionamento di un otro festival, cu tambe a para cu ta Carubbean Festival na San Nicolas. Minister encarga cu Cultura, Otmar Oduber a sigura cu nada no a bay malo cu e organisacion pero cu ta restructurando pa bin cune den un bachi manera mester ta. E festival aki ta cuminsa bek dia 14 di augustus awor.

Bek pa Bon Bini festival, Dumfries a splica cu a suspende e festival pa un siman ‘pa motibonan fuera di nan alcanse’. Mes momento manera indica caba, tin fondo pa sigui organisa esaki te cu fin di aña. No ta bisa si kico ta pasa despues di fin di aña. Manera ta conoci, e Bonbini Festival ta un plataforma caminda cu nos artistanan local den sector cultural, folklore y artesanonan ta haya oportunidad pa expresa nan talento.