Gobierno cu ultimatum pa Preserva Malmok riba cobramento di multa

ORANJESTAD - Gobierno pa medio di nan abogadonan, a pone un ultimatum pa Preserva Malmok pa awe (diahuebs) merdia, unda cu nan (Preserva Malmok) ta confirma cu nan no lo cobra e multa contra gobierno pa e caso di Zissu Properties NV.  E abogado pa gobierno, Hans Sjiem Fat, a confirma esaki awe mainta pa NoticiaCla.com. Un dia prome, abogado di Preserva Malmok a sigura cu e menasa di multa ta keda vigente, pasobra gobierno no a apela e sentencia. Awe, gobierno ta contradeci esaki y ta tira e bala den tereno di Preserva Malmok. Abogado pa Zissu Properties a confirma na NoticiaCla.com tambe cu e loke cu Gomez ta bisa, no ta cuadra tampoco. 

VEREDICTO TA HOPI CLA

Segun Sjiem Fat, e veredicto e siman aki entre Zissu Properties NV y Preserva Malmok tabata hopi cla. "Ta masha cla cu Zissu a gana nan caso contra e habitantenan y Preserva Malmok. E desicion cu tabatin den prome instancia a wordo 'vernietigd' pues e no tin validez mas. Como tal, no tin ningun dwangsom cu por cobra di gobierno, si gobierno lo mester dicidi di duna e hotelvergunning" e abogado a sigui bisa. "Mi no ta kere cu tin problema pa duna e hotel vergunning aworaki, basta cu Zissu cumpli cu tur rekisitonan di ley". E abogado ta mustra cu e sentencia di hues ta bisa cu por duna e permiso y cu no tin 'obhecion'. 

MENASA PA COBRA MULTA

E problema segun e abogado ta cu Preserva Malmok y nan abogado a menasa cu nan ta bay considera pa cobra e multa. "Y como cu e dwangsom ta yega te na 10 miyon florin, nos ta kere cu ta necesario pa gobierno bay corte pa pidi un orden di corte pa e dwangsom no por wordo cobra". E interpretacion di abogado di Preserva Malmok, esta Dello Gomez, - cu e multa impone pa hues na januari ta keda vigente pasobra gobierno no a apela y como tal e multa ey ta keda vigente- , no ta corecto. "Den nos opinion no. E no ta haci diferencia si gobierno apela si of no. Nan (Preserva Malmok) a perde nan caso y nan no tin ningun motibo legitimo pa sigui opone e dunamento di e hotelvergunning", Sjiem Fat a bisa. "Si nan no ta contento cu e desicion di corte di apelacion, tin cu bay cassatie". 

PAKICO GOBIERNO NO A APELA

E motibo pa cual gobierno no a apela e sentencia di januari segun abogado, ta pasobra a tuma un posicion neutral. "E pleito no tabata cu nos, pero mas bien entre Zissu y e habitantenan, y p'esey nos kier a sa di corte di apelacion kico ta e direccion cu gobierno mester bay den e asunto aki". 

ULTIMATUM PA PRESERVA MALMOK

Pa loke ta e menasa di Gomez, Sjiem Fat a confirma cu ta wardando riba nan reaccion y ta duna e deadline te merdia y si no haya un reaccion positivo cu ta bisa cu nan no ta bay ehecuta e boet, e ora gobierno ta haya su mes forsa pa bay corte. "Pasobra e boet ta yega na un total di 10 miyon florin y esey no ta placa pa haci wega cu ne. E ultimatum ta pa 12'or di merdia", e abogado a finalisa bisando.