De Cuba: Kier claridad riba pensioen di trahadonan di AAA NV

ORANJESTAD - Problema na AAA NV actualmente ta e asunto di pensioen. Segun presidente di e sindicato representativo STA, Diego de Cuba, e ta algo cu pa añanan ta discutiendo ariba. E problema ta cu durante negosacion biaha pasa cu pa e negociacion aki mester hiba tur hende APFA, en bes di Guardian. Como tal tur cos cu firma cu e compania Guardian, mester tin un clausula pa por bula afo na tempo ora cu bay pa APFA.

AAA NO A ZEG OP GUARDIAN

E problema sinembargo ta cu, -segun de Cuba-, AAA no a 'zeg op' esaki na juni 2015. Esey a pone cu tin dos caminda cu por cana awor. A compronde di de Cuba cu mayoria di trahado (di Triple A) kier bay APFA. Y si sigui e plan di bay APFA sin mas, ta hinca Triple A den un spot unda cu Guardian lo hiba AAA NV corte pa incumplimento di contracto. "Triple A por hay'e ta paga e ora casi 3 miyon florin. Nos a bisa cu nos kier un salida pa e problema aki y lo papia cu e miembronan awor" de Cuba a bisa. Segun e sindicalista, a sinti pa masha tempo cu tabatin un problema y cu e compania tabata scondiendo algo pa nan. 

REUNIONNAN MESTER CLARIFICA E SITUACION

Segun de Cuba, diamars e CEO di AAA Jim Fazio a keda di reuni cu su team negoshador y diaranson mainta lo e sindicato reuni cu e team ey tambe pa wak ki rumbo lo coy. E reunion di diaranson lo tabata determinante di kico mas lo mester a sosode. Si obliga e trahadonan pa keda cu Guardian, no ta problema aunke cu e ora e compania mester duna e trahadonan un tremendo CAO. "Un CAO di kita sombre" de Cuba a bisa. "Esey mester recompensa e otro banda" de Cuba a sigui bisa. No ta conoci con a bay cu e reunion di awe mainta y ta pendiente proximamente.