Tin indicacion cu pakete di CAO pa trahadonan Hilton por keda cla

ORANJESTAD - E situacion laboral na Hilton hotel por haya su solucion e siman aki ainda. Segun mediado di gobierno Anselmo Pontilius, ta intermediando pa e solucion bin lihe. Como tal tabata riba peticion di e compania, cu Pontilius ta intermediando. Dialuna a entrega un proposicion y diamars partidonan mester a topa na sede di mediado di gobierno pa wak con por a sali afo y acepta e oferta y wak si e siman aki ainda por a yega na un acuerdo. 

E PROBLEMA

E problema a cuminsa ora cu e trahadonan a rechasa e proposicion cu Hilton a pone riba mesa recientemente, esta e pakete financiero. E tabata un aumento di 1% cada aña. E problema segun Pontilius, ta un aumento cu e compania a duna 3 aña pasa y awor nan ta reclama esaki bek. Esey a empeora e situacion segun e mediado di gobierno. "A coregi esaki den un proposicion y nos ta spera cu entrante e siman aki por tende cu partidonan por bay interno den nan seno pa delibera pa wak si por biba cu e proposicion of mester modifica esaki."