Lenny Kravitz y Burt Bacharach presente den CNSJ 2016

WILLEMSTAD - Ya nos a anunsciaun lista di nombernan tremendo pa e edicion di CNSJ 2016 y awe nos por añadí tres nomber mas na e lista aki pa diasabra.  J Balvin lo habri diasabra anochi riba stage Sam Cooke y Lenny Kravitz lo clausura diasabra anochi na stage Sam Cook. Tambe nos por anuncia Burt Bacharach y su orkesta cu lo actua riba e dia ey riba stage Celia. Y riba diaranson 31 di augustus nos por confirma actuacion di Al Jarreau na Brakapoti Mei Mei.

E compositor y cantante Mericano y multi instrumentalista, productor y actor Lenny Kravitz, tin un pia den rock y e otro den soul, pero tambe a crece den mundo di jazz. Cu su debut album na 1989 Let love Rule e la sa di penetra den mundo farandulero. Despues di ey a sigui diferente hit manera “Always on the Run”, “it Ain’t Over ‘til it’s Over” y “Are You Gonna Go My Way”. Tambe Kravitz a gana pa 4 aña sigui un Grammy Award como miho cantante di Rock masculino. Cu esey e la kibra un record como cantante masculino cu mas premio den e categoria ey. Tambe e tin e record como mas premio gana sigui den un categoria. Na 2014 su ultimo disco a sali “Strut”, sigui den 2015 pa su video di concierto Just let Go.  

J Balvin, su nomber original ta José Alvaro Osorio Balvin, ta un cantante di reggaeton di Medellin, Colombia. Como mucha e ta tin masha interes pa diferente sorto di musica hiphop, dancehall, champeta y bachata y a cuminsa su carera cu su 17 aña y a biaha pa Merca pa bay studia ingles. Durante e 10 añanan cu a sigui e la traha na ambos pais y a haña fama den e categoria urbano y bou di dj-nan. Aña pasa e la keda nomina na 13 ocasion pa Billboard Latin Music Award. Su exitonan ta Yo te lo Dije, Tranquila, Ay Vamos, 6 AM y Ginza

Casi tur hende na mundo, consiente of inconcientemente conoce un piesa skirbi pa Burt Bacharach. E maestro compositor, cu e aña aki ta yega e edad di 88 aña, a compone gran mayoria di su exitonan hunto cu Hal David. Piesanan manera: Walk On By, What The World Needs Now Is Love y I Say A Little Prayer ta djis algun numero saca for di e repertorio amplio di e leyenda bibo aki.

Como yiu di un predicador Al Jarreau (1940) a pone su prome pasonan den koor di misa. E la start su carera como profesional cu un banda cu George Duke. Na 1975 e la saca e disco We Got By y logra exito grandi cerca e publico na 1981 cu su disco Breakin’ Away, incluso su mega hit Roof Garden. Na 7 ocasion e la risibi un Grammy Award y ta e unico artista cu a gana un Grammy den tres categoria: Jazz, R&B en Pop.