Fundacion Lets Talk ta activa su programa pa 2014 awe nochi

ORANJESTAD - Fundacion Let’s talk keto bai ta trahando low profile ariba proyectonan pa nos hubentud. Na aña 2013 Fundacion Let’s Talk a cuminsa draai e proyecto “ Peace Soldiers” (soldatnan di paz) cual tin como meta pa duna guia na hobennan/ hobennan adulto entre edad di 10 p 25 aña cu pa un motibo of otro no a caba school y a haña nan mes envolvi den gruponan negativo. Na aña 2013 a draai e proyecto na Santa Cruz, San Nicolas y tambe a cuminsa den e bario di Madiki, pero pa motibonan imprevisto mester a para e proyecto aki un rato.

E proyecto “ Bo sa cu bo por” ta un proyecto nobo, cual no solamente lo inclui e guia di e hobennan pero alaves den estrecho participacion di mayornan. Fundacion Let’s Talk ta conciente cu tin varios organisacion trahando ariba e tereno nan aki, y ta aplaudi esaki inmensamente. . E concepto di Let’s Talk ta un tiki diferente di e otro proyectonan aki pasobra ta deal cu e hobennan cu tin biaha ni ta haña e oportunidad di participa na e proyectonan menciona, y ta purba di traha integralmente hunto cu diferente organisacionnan.

A dicidi awor ariba peticion di varios major, pa re-inicia e proyectonan aki. E proyecto di Soldatnan di Paz, cual tin un duracion di 3 luna, lo wordo gedrai den cooperacion estrecho cu Bureau Slachtofferhulp, CEDEHM, Directie Volksgezondheid ( DBZ), Cuerpo Policial, Fundacion Tienda di Educacion, y Elka & Associates. Prome cu cuminsa cu e proyectonan ta importante pa sondea e interes di parti di e hobennan y mayornan pa asina por dicidi si ta sigui si of no.

Pa e motibo aki ta invita tur hoben y mayornan of esnan encarga cu hobennan pa asisti na un anochi di informacion cual lo tuma lugar na Cas di Cultura, diahuebs 7 di augustus venidero di 7 or pa 9 or di anochi. Durante di e anochi aki lo duna mayornan tur informacion y por inscribe pa e proyecto. Tur e project ta completamente gratis pa e participantenan. Un y tur cu kier participa of haña informacion ta wordo invita pa pasa libremente y participa na dicho anochi di informacion.