Gobierno ainda mara na prohibicion pa duna permiso di hotel pa Ocean Z

ORANJESTAD - E hecho cu tabatin sentencia ayera na fabor di Zissu Properties NV no kiermen cu e hotel por cuminsa opera. "Gobierno no ta esun cu a apela e sentencia (di 13 di januari ) pues e sentencia di ayera no ta conta pa gobierno" abogado Dello Gomez di Preserva Malmok a bisa NoticiaCla.com diaranson mainta. E consecuencia di loke cu Gomez a bisa, ta pues cu ainda e prohibicion pa gobierno duna Zissu Properties NV un permiso di hotel ta keda vigente, completo cu e multa cu lo impone di 25 mil florin pa cada dia cu viola e sentencia di 13 di januari ultimo. 

CAMPEON SIN CORONA

De hecho segun Gomez, mientras cu e no kier duna e sentencia di diamars un titulo, Zissu Properties NV ta un campeon sin corona, manera cu un persona a relata na Gomez e mainta di e sentencia. Segun Gomez, berdad cu Zissu Properties NV a gana su caso, pero e situacion no a cambia. "Awe ainda no tin un permiso (pa opera un hotel), si pais (Aruba) duna un permiso, e ta risca un dwangsom. Si e permiso bin, e por wordo apela via un caminda di LAR" Gomez a bisa. Como tal, segun Gomez siguramente e sentencia di diamars no ta pone un punto tras di e asunto aki. 

META LOGRA PARCIALMENTE

E abogado ta mustra cu parti di e meta (di Preserva Malmok) a wordo logra. "Aworaki no tin eventonan, no por tin eventonan manera cu a wordo propaganda den prome instancia" Gomez a bisa. Pa loke ta e proximo paso di e mandatario en cuestion cu tin cu duna e permiso di hotel, e tin cu tene su mes na regla di bon gobernacion y tin cu haci un evaluacion cu si e duna un permiso di hotel, si e ta violando e sentencia di 13 di januari cu ta nifica cu pais Aruba tin cu incuri dwangsom di maximo 10 miyon florin.