Abath: Arubianonan cu pasaporte Hulandes por sigui biaha pa Merca

ORANJESTAD - Ningun momento Merca a stop esnan cu pasaporte Hulandes di biaha pa Merca uzando e Visa Waiver program y e privilegio di ESTA. Asina e consulado Mericano na Corsou a sigura e siman aki. Ayera un biaha mas director di departamento di relaccionan exterior na Aruba Edwin Abath a reitera esaki. 

MENSAHE RIBA FACEBOOK

Den un mensahe riba su pagina di Facebook, Abath a clarifica e situacion un biaha mas. "Viaheronan Arubano portadornan di e pasaporte Hulandes y di e demas islanan di Caribe Hulandes, ta mantene e privilegio di ESTA y Visa Waiver Program" Abath ta bisa. E ta referi na e rumornan cu a surgi recientemente, como si fuera cu Aruba y otro partinan di Caribe Hulandes lo no bin na remarke mas pa ESTA (e sistema electronico di autorisacion pa biahe) y e programa di Visa Waiver pa por biaha pa Merca. 

ACLARIACION

"Consulado General di Merca na Willemstad a aclaria na Departamento di Relacionnan Exterior di Aruba cu esaki no ta basa riba berdad. Nada no a cambia den e areglo existente, pues tur portador di un pasaporte Hulandes cu e-pasport ta mantene e privilegio pa viaha pa Merca y registra via e sistema electronico ESTA", Abath ta cita di e declaracion di e consulado. 

CONFUSION

E confusion a surgi a base di un publicacion bieu di e Departmento di Seguridad Nacional di Merca rond di e fecha 10-10-2010 y a bolbe surgi como un rumor 6 aña despues. Consulado General di Merca a publica un comunicado di prensa dismintiendo e rumornan cu a surgi, mientras cu e Departamento di Seguridad Nacional di Merca pronto tambe lo emiti un formulacion nobo riba e seccion FAQ's di nan pagina web cu lo mester caba di elimina e confusion.