Team #STOPAWO cu poster 'Guia Pa Mayor y Cuidado'

ORANJESTAD - E siman aki e team cu ta carga #STOPAWO a haci entrega oficial di e poster “Guia Pa Mayor y Cuidado” na e comunidad di Aruba. E ta un poster cu ta ilustra 17 instancia y organisacionnan segun e urgencia of necesidad di e caso. 

Intencion ta pa di e forma aki yuda mayor y cuidado haña e caminda ora nan tin necesidad riba conseho, guia, ayudo of na momento cu nan tin un preocupacion tocante e desaroyo of situacion di un mucha. Na november 2015 a haci presentacion caba di e poster aki y finalmente nos por presente awe gradecido na ayudo financiero di CEDE Aruba. Mirando cu durante november semper tin hopi actividad di conscientisacion, a dicidi di sigui ehempel di Merca, unda april ta e luna pa conscientisa tocante prevencion di abuso di mucha.

E poster “Guia pa Mayor y Cuidado” a wordo presenta pa prome biaha den cuadro di e Dia Internacional di Derecho di Mucha na november 2015. Team #STOPAWO a bin cu e idea aki mirando cu hopi mayor y cuidado na Aruba no tin suficiente claridad unda mester acudi na e momento cu tin necesidad pa haci pregunta y haña sosten. Esaki ta pa prome biaha caminda cu organisacionnan cu ta directamente accesibel pa comunidad ta riba un solo poster. Cada un seccion ta identifica su mes cu un color riba e poster, tabata tin un representante cu a hiba palabra.

E poster ta parti den 5 categoria: prevencion (roos), guia (biña), ayudo (blauw), preocupacion (oranje) y por ultimo e categoria di crisis (cora). Esaki ta nifica cu pa mayor y cuidado cu tin un pregunta of ta desea un conseho por acudi  na e instancia den e prome categoria cu ta e color “roos”. Mayornan cu ta sinti cu nan mester di guia of ayudo por acudi na e instancianan den e categorianan “biña” y “blauw”. Asina por sigui bay na e instancia y organisacion mas abou den e poster. Aki ta trata di instancia y organisacion ora cu ya tin un preocupacion of e problema ya a escala caba. Esaki ta e colornan “oranje” y “cora”. Segun sra Tecklenborg cu ta encabesa e grupo a informa cu e poster lo bay ta visibel rond di henter Aruba na lugarnan strategico entre otro scolnan, clubnan di deporte, GO’s, NGO’s, Wit Gele Kruis, Hospital y companianan di utilidad. Durante e proximo simannan tur 500 poster lo wordo reparti door di nos colaboradornan. Si tin lugarnan cu ta desea di haña un poster, por fabor tuma contacto cu Fundacion Respeta Mi na e telefon: 582-4433. Tambe por bishita e Facebook page di STOPAWO y download e poster digital.”