Interes grandi pa contenido di protocol AZV

ORANJESTAD – Tin hopi interes pa e protocol cu gremionan comercial y sindical tin cu firma awe tardi, pa aumenta e prima di AZV cu 1%. E ta wordo yama ‘e protocol di azv’ pasobra mayoria di e 23 puntonan den e protocol ta referi na cambionan cu tin cu tuma lugar pa cu AZV. (Lesa e protocol aki) Entre nan e aumento di prima, aunke cu e nomber di e aumento a haya un nomber diferente. Manera cu NoticiaCla a raporta caba, ta trata di un asina yama ‘bestemmings belasting’ di 1% cu tin cu wordo introduci pa comienso di september di e aña aki ainda. “Nos ta trahando duro pa e ley aki keda cla” tabata comentario diaranson di minister di salud Alex Schwengle.

Loke tin gremionan (primordialmente esnan di comercio) precupa, ta e garantia cu e ‘belasting’ aki berdaderamente lo por wordo destina pa AZV y e garantia pa cu esey. Y si esaki enberdad ta wordo aloca pa AZV, pero mas importante ainda, bou di ki post. Gremionan cu NoticiaCla a papia cune ta mustra cu nan no ta sinti cu ta husto cu gobierno ta bolbe aumenta e peso riba e pueblo, mientras cu den e aparato gubernamental no ta cortando suficiente ainda. Esey ta pues pone cu tanto gremionan comercial como sindical ta resisti contra e idea di firma e protocol diahuebs atardi.

Manera cu NoticiaCla a raporta tambe, gremionan ta considera cu e aumento aki, ta nada menos cu un BBO camufla, y a ‘duna e bestia un otro nomber’, manera e dicho popular hulandes ta bisa. “Dificil nan por yame BBO pasobra a campaña contra esaki den eleccion” un miembro di gremio comercial a confia na NoticiaCla. Loke tin nan tambe precupa ta cu dependiendo di e suma genera pa e 1%, e por te hasta cubri parti di e ‘landsbijdrage’, cu ta pone cu defacto gobierno ta uza pueblo atrobe pa ‘yuda’ financia e parti di landsbijdrage, esta e parti cu gobierno tin cu aporta cune. Algo cu indirectamente caba, e pueblo ta pagando.

For di momento cu NoticiaCla a publica e protocol diaranson, e interes pa mira esaki a aumenta. Y como tal NoticiaCla ta ‘repost’ e protocol pa interes di un y tur mira kico tur ta loke ta den wega diahuebs atardi ora cu gremionan topa otro atrobe. Manera NoticiaCla a raporta tambe, segun un nota obteni, e impuesto extra di 1% cu AZV ta yama ‘health tax’, mester genera por lo menos 21.2 miyon florin den e ultimo tres luna di aña 2014. Pa 2015 esaki ta aumenta te na 63.8 miyon y finalmente na 2017 esaki ta bira 69 miyon pa aña. Na tur calcula, e tin cu genera pues entre 5 pa 7 miyon florin extra pa AZV tur luna.

Politicamente, ta considera e zet di firma otro protocol yena cu compromiso, como algo ilogico si tene na cuenta cu tin un comision (College Financieel Toezicht) cu ta investigando e presupuesto di pais Aruba y cu mester bin cu su resultado fin di luna awor, cu por ensera varios ahustacion y medida. Medidanan cu lo por converti combenionan nobo firma, como obsoleto. Esey ta pensamento di por lo menos e partido politico den oposicion MEP.