Hospital Horacio Oduber ta desmenti cu ta evacuando pashent

ORANJESTAD - "Nos no por papia di ningun calamidad, ni cu nos ta evacuando pashentnan. Esey simplemente bisa, no ta berdad", asina Charlaine Alexander-Huntington, vocero di Dr. Horacio E. Oduber Hospitaal a cuminsa bisando. E ta reacciona riba tantisimo publicacionnan haci riba red social, den cual ta bisa cu tanto na e Departamento di mucha como e diferente verpleegafdelingen na unda adulto ta hospeda ta mandando hende cas pa motibo di virus of bacteria.

PROTOCOL DELIÑA

Na Dr. Horacio E. Oduber Hospitaal tin protocolnan y plannan bon deliña con pa atende cu casonan asina. De facto, semper por tin bacteria den un hospital, pero e reto ta pa mantene controla. Mester ta cla pa tur hende cu semper por tin bacteria of virus den un hospital, pero locual hopi biaha publico no ta compronde ta, cu no ta den hospital e bacteria of virus ta, sino cerca e pashentnan mes cu ta drenta hospital paso nan ta malo y mester di cuido!

VIRUS TA COMUN

Un hospital ta in instituto cu ta atende hende malo. Pues, e chens cu un pashent ta drenta cu un virus of cu bacteria ta grandi y masha comun, pero e protocolnan interno ta percura pa isola e pashentnan mesora si ta necesario, pa evita cu un  ta contagia otro.

CONFIRMA HOPI PASHENT CU GRIEP PISA

Ultimo simannan berdad ta nota bastante pashent cu griep pisa drentando y cu ta afecta nan pulmon. Casonan asina mesora ta isola pa cambernan separa pa preveni cu ta pega otro pashentnan cu e enfermedad.

LAMENTA INSINUACION RIBA REDNAN SOCIAL

"Nos tin mas o menos mil empleado trahando den Hospital ta garantisa e miho cuido posibel na e mas di 16 mil pashentnan cu nos ta brinda cuido anualmente. Nos ta lamenta cu facilmente un hende por pone un impresion of insinua algo riba red social y sin puntra of verifica, na unda mesora mas hende ta comparti e informacion cu ta falso y por causa incertidumbre y particularmente confusion den e comunidad di Aruba", segun Alexander-Huntington.